ᠲᠤᠰ ᠰᠣᠨᠢᠨᠤ ᠮᠡᠳᠡᠭᠡ (ᠰᠤᠷᠪᠤᠯᠵᠢᠯᠠᠭᠴᠢ ᠮᠥᠷᠡᠨ) 7 ᠰᠠᠷᠠᠶᠢᠨ 13ᠤ ᠡᠳᠦᠷ᠂ 30 ᠭᠠᠷᠤᠢ ᠵᠢᠯᠤᠨ ᠴᠠᠭ ᠬᠤᠭᠤᠴᠠᠭᠠᠶᠢ ᠬᠡᠷᠡᠭᠰᠡᠨ 4 ᠦᠶᠡᠶᠢᠨ ᠡᠷᠳᠡᠮᠲᠡᠳᠦᠨ ᠤᠢ ᠪᠢᠯᠢᠭ᠂ ᠬᠦᠴᠦ ᠬᠥᠳᠡᠯᠮᠦᠷᠢᠪᠡᠷ ᠪᠦᠲᠦᠭᠡᠭᠳᠡᠭᠰᠡᠨ ᠮᠣᠩᠭᠤᠯ ᠬᠡᠯᠡ ᠱᠢᠨᠵᠢᠯᠡᠯᠤᠨ ᠲᠣᠮᠤᠬᠠᠨ ᠪᠦᠲᠦᠭᠡᠯ ᠪᠣᠯᠬᠤ 《ᠥᠪᠦᠷ ᠮᠣᠩᠭᠤᠯᠤᠨ ᠮᠣᠩᠭᠤᠯ ᠬᠡᠯᠡᠨᠤ ᠨᠤᠳᠤᠭᠤᠨ ᠠᠶᠠᠯᠭᠤᠨᠤ ᠭᠠᠵᠠᠷᠤᠨ ᠵᠢᠷᠤᠭᠤᠨ ᠪᠠᠢᠴᠠᠭᠠᠯᠲᠠᠶᠢᠨ ᠮᠠᠲᠧᠷᠢᠶᠠᠯᠤᠨ ᠴᠤᠪᠤᠷᠠᠯ》 ᠥᠪᠦᠷ ᠮᠣᠩᠭᠤᠯᠤᠨ ᠶᠡᠬᠡ ᠰᠤᠷᠭᠠᠭᠤᠯᠢᠳᠤ ᠵᠢᠩᠬᠢᠨᠢᠪᠡᠷ ᠲᠠᠷᠬᠠᠭᠠᠭᠲᠠᠯᠠ᠃
ᠡᠨᠡᠨᠢ ᠱᠢᠨᠡ ᠳᠤᠮᠳᠠᠲᠤ ᠤᠯᠤᠰ ᠪᠠᠢᠭᠤᠯᠤᠭᠳᠠᠭᠰᠠᠨ 70 ᠵᠢᠯᠤᠨ ᠲᠤᠷᠱᠢᠬᠢ ᠮᠠᠨᠤ ᠣᠷᠤᠨᠤ ᠲᠡᠦᠬᠡᠨᠳᠡᠬᠢ ᠬᠠᠮᠤᠭᠦᠨ ᠠᠩᠬᠠᠳᠠᠭᠴᠢ ᠮᠣᠩᠭᠤᠯ ᠬᠡᠯᠡᠨᠤ ᠨᠤᠳᠤᠭᠤᠨ ᠠᠶᠠᠯᠭᠤᠨᠤ ᠭᠠᠵᠠᠷᠤᠨ ᠵᠢᠷᠤᠭ ᠮᠡᠨᠳᠦᠯᠡᠭᠰᠡᠨᠢ ᠬᠠᠷᠠᠭᠤᠯᠵᠤ ᠪᠠᠢᠭᠠ ᠪᠥᠭᠡᠳ ᠮᠣᠩᠭᠤᠯ ᠬᠡᠯᠡᠨᠤ ᠨᠤᠳᠤᠭᠤᠨ ᠠᠶᠠᠯᠭᠤᠨᠤ ᠰᠤᠳᠤᠯᠤᠯ᠂ ᠨᠤᠳᠤᠭᠤᠨ ᠠᠶᠠᠯᠭᠤᠨᠤ ᠬᠤᠪᠢᠶᠠᠷᠢᠯᠠᠯ ᠬᠢᠭᠡᠳ ᠨᠤᠳᠤᠭᠤᠨ ᠠᠶᠠᠯᠭᠤᠨᠤ ᠬᠥᠭᠵᠢᠯ ᠬᠤᠪᠢᠷᠠᠯ ᠵᠢᠴᠢ ᠪᠠᠷᠢᠮᠵᠢᠶᠠ ᠠᠪᠢᠶᠠᠶᠢ ᠲᠦᠭᠡᠮᠡᠯᠵᠢᠭᠦᠯᠵᠦ ᠳᠡᠯᠭᠡᠷᠡᠭᠦᠯᠬᠦ ᠪᠠ ᠬᠡᠯᠡᠨᠤ ᠲᠥᠯᠦᠪᠵᠢᠭᠦᠯᠭᠡ ᠵᠡᠷᠭᠡ ᠠᠵᠢᠯᠳᠤ ᠴᠢᠬᠤᠯᠠ ᠦᠨᠡ ᠦᠷᠳᠡᠭ ᠪᠦᠬᠦᠢ ᠬᠣᠪᠤᠷ ᠴᠤᠬᠠᠭ ᠪᠠᠷᠢᠮᠲᠠ ᠬᠠᠩᠭᠠᠨ ᠥᠭᠭᠦᠭᠰᠡᠨ ᠶᠠᠪᠤᠳᠠᠯ ᠪᠣᠯᠤᠯᠠ᠃
ᠣᠢᠯᠠᠭᠠᠭᠰᠠᠨᠢᠶᠠᠷ᠂ ᠨᠤᠲᠤᠭᠤᠨ ᠠᠶᠠᠯᠭᠤᠨᠤ ᠭᠠᠵᠠᠷ ᠵᠦᠢᠶᠢᠨ ᠰᠤᠳᠤᠯᠭᠠᠨᠢ ᠪᠠᠰᠠ ᠬᠡᠯᠡᠨᠤ ᠭᠠᠵᠠᠷ ᠵᠦᠢᠶᠢᠨ ᠰᠤᠳᠤᠯᠭᠠᠨ ᠭᠡᠵᠤ ᠶᠠᠷᠢᠬᠤ ᠮᠥᠷᠲᠡᠭᠡᠨ ᠲᠡᠷᠡᠨᠢ ᠶᠠᠮᠠᠷ ᠨᠢᠭᠡᠨ ᠬᠡᠯᠡ ᠠᠶᠠᠯᠭᠤᠨᠤ ᠳᠣᠲᠤᠭᠠᠳᠤᠳᠡᠬᠢ ᠢᠯᠭᠠᠭᠠ ᠵᠥᠷᠢᠶᠡ ᠪᠠ ᠲᠡᠳᠡᠭᠡᠷᠦᠨ ᠲᠠᠷᠬᠠᠴᠠᠶᠢᠨ ᠪᠠᠢᠳᠠᠯᠢ ᠭᠠᠵᠠᠷᠤᠨ ᠵᠢᠷᠤᠭᠤᠨ ᠠᠷᠭᠠᠪᠡᠷ ᠢᠯᠡᠳᠬᠡᠵᠤ ᠲᠣᠳᠤᠷᠬᠠᠢᠯᠠᠳᠠᠭ ᠬᠡᠯᠡ ᠱᠢᠨᠵᠢᠯᠡᠯᠦᠨ ᠨᠢᠭᠡᠨ ᠰᠠᠯᠪᠦᠷᠢ ᠤᠬᠠᠭᠠᠨᠶᠤᠮ᠃ ᠮᠠᠨᠤ ᠣᠷᠤᠨᠳᠤ ᠮᠣᠩᠭᠤᠯ ᠬᠡᠯᠡᠨᠤ ᠨᠤᠲᠤᠭᠤᠨ ᠠᠶᠠᠯᠭᠤᠨᠤ ᠭᠠᠵᠠᠷ ᠵᠦᠢᠶᠢᠨ ᠰᠤᠳᠤᠯᠭᠠᠨ ᠳᠡᠭᠡᠷᠡ ᠵᠠᠭᠤᠨᠤ ᠨᠠᠶᠠᠭᠠᠳ ᠣᠨᠳᠤ ᠡᠬᠢᠯᠡᠵᠤ᠂ ᠬᠣᠵᠢᠮᠨᠢ ᠡᠨᠡᠬᠦ ᠠᠵᠢᠯ ᠨᠢᠭᠡ ᠦᠶᠡ ᠲᠠᠰᠤᠯᠤᠭᠳᠠᠭᠰᠠᠨ ᠪᠤᠯᠪᠠᠴᠦ ᠤᠯᠠᠨ ᠡᠷᠳᠡᠮᠳᠡᠳᠦᠨ ᠴᠢᠷᠮᠠᠢᠯᠭᠠᠪᠠᠷ ᠳᠠᠬᠢᠨ ᠰᠡᠷᠭᠦᠭᠡᠭᠳᠡᠵᠤ᠂ ᠭᠤᠴᠢᠭᠠᠳ ᠵᠢᠯᠳᠤ ᠮᠠᠨᠤ ᠣᠷᠤᠨᠤ ᠮᠣᠩᠭᠤᠯ ᠬᠡᠯᠡ ᠱᠢᠨᠵᠢᠯᠡᠯᠦᠨ ᠡᠷᠳᠡᠮᠳᠡᠳ ᠤᠷᠢᠳ ᠬᠣᠵᠢᠳ ᠥᠪᠦᠷ ᠮᠣᠩᠭᠤᠯᠤᠨ 9 ᠠᠢᠮᠠᠭ ᠬᠤᠳᠠᠶᠢᠨ 54 ᠬᠣᠱᠢᠭᠤ ᠱᠢᠶᠠᠨᠤ 540 ᠱᠢᠬᠠᠮ ᠴᠡᠭᠲᠤ ᠬᠦᠷᠴᠤ᠂ ᠮᠣᠩᠭᠤᠯ ᠬᠡᠯᠡᠨᠤ ᠨᠤᠲᠤᠭᠤᠨ ᠠᠶᠠᠯᠭᠤᠨᠤ ᠶᠡᠷᠦᠩᠬᠡᠢ ᠣᠨᠴᠠᠯᠢᠭ ᠵᠢᠴᠢ ᠨᠤᠲᠤᠭᠤᠨ ᠠᠶᠠᠯᠭᠤᠨᠤ ᠳᠤᠲᠤᠭᠠᠲᠤᠳᠡᠬᠢ ᠢᠯᠭᠠᠭᠠ ᠵᠥᠷᠢᠶᠡ᠂ ᠲᠠᠷᠬᠠᠴᠠᠶᠢᠨ ᠲᠤᠬᠠᠢ ᠨᠠᠷᠢᠨ ᠪᠠᠢᠴᠠᠭᠠᠯᠲᠠ ᠬᠢᠵᠠᠢ᠃ ᠡᠨᠡᠬᠦ ᠰᠠᠭᠤᠷᠢᠨ ᠳᠡᠭᠡᠷᠡ 《ᠶᠡᠷᠦᠩᠬᠡᠢ ᠥᠭᠦᠯᠡᠯᠦᠨ ᠪᠣᠳᠢ》 ᠂ 《ᠠᠯᠠᠱᠠ ᠠᠢᠮᠠᠭᠤᠨ ᠪᠣᠳᠢ》 ᠂ 《ᠣᠷᠳᠤᠰ ᠬᠤᠳᠠᠶᠢᠨ ᠪᠣᠳᠢ》 ᠂ 《ᠱᠢᠯᠢᠶᠢᠨ ᠭᠣᠤᠯ ᠠᠢᠮᠠᠭᠤᠨ ᠴᠠᠬᠠᠷᠤᠨ ᠪᠣᠳᠢ》 ᠵᠡᠷᠭᠡ 13 ᠪᠣᠳᠢ 《ᠥᠪᠦᠷ ᠮᠣᠩᠭᠤᠯᠤᠨ ᠮᠣᠩᠭᠤᠯ ᠬᠡᠯᠡᠨᠤ ᠨᠤᠲᠤᠭᠤᠨ ᠠᠶᠠᠯᠭᠤᠨᠤ ᠭᠠᠵᠠᠷᠤᠨ ᠵᠢᠷᠤᠭᠤᠨ ᠪᠠᠢᠴᠠᠭᠠᠯᠲᠠᠶᠢᠨ ᠮᠠᠲᠧᠷᠢᠶᠠᠯᠤᠨ ᠴᠤᠪᠤᠷᠠᠯ》 ᠭᠡᠬᠦ ᠲᠣᠮᠤᠬᠠᠨ ᠪᠦᠳᠦᠭᠡᠯᠢ ᠨᠠᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠵᠦ᠂ ᠪᠣᠳᠢ ᠪᠦᠷᠢᠳᠤ ᠡᠮᠦᠨᠡᠬᠢ ᠦᠭᠡ᠂ ᠳᠠᠩ ᠦᠭᠡᠶᠢᠨ ᠪᠠᠢᠴᠠᠭᠠᠯᠲᠠᠶᠢᠨ ᠮᠠᠲᠧᠷᠢᠶᠠᠯ᠂ ᠬᠡᠯᠡᠨ ᠵᠦᠢᠶᠢᠨ ᠪᠠᠢᠴᠠᠭᠠᠯᠲᠠᠶᠢᠨ ᠮᠠᠲᠧᠷᠢᠶᠠᠯ᠂ ᠪᠡᠶᠡᠶᠢᠨ ᠲᠥᠯᠦᠭᠡᠨᠤ ᠦᠭᠡ ᠪᠠ ᠵᠢᠭᠠᠬᠤ ᠲᠥᠯᠦᠭᠡᠨᠤ ᠦᠭᠡᠶᠢᠨ ᠪᠠᠢᠴᠠᠭᠠᠯᠲᠠᠶᠢᠨ ᠮᠠᠲᠧᠷᠢᠶᠠᠯ᠂ ᠨᠤᠲᠤᠭᠤᠨ ᠠᠶᠠᠯᠭᠤᠨᠤ ᠭᠠᠵᠠᠷᠤᠨ ᠵᠢᠷᠤᠭᠤᠨ ᠰᠣᠩᠭᠤᠮᠠᠯ ᠵᠡᠷᠭᠡ ᠠᠭᠤᠯᠭᠠᠶᠢ ᠲᠣᠬᠢᠷᠠᠭᠤᠯᠪᠠ᠃
ᠶᠣᠰᠤᠯᠠᠯᠳᠤ ᠪᠠᠰᠠ ᠱᠠᠩᠬᠠᠢ ᠨᠤᠲᠤᠭᠲᠠᠢ ᠡᠷᠳᠡᠮᠲᠡᠨ᠂ ᠥᠪᠦᠷ ᠮᠣᠩᠭᠤᠯᠤᠨ ᠮᠣᠩᠭᠤᠯ ᠬᠡᠯᠡᠨᠤ ᠨᠤᠲᠤᠭᠤᠨ ᠠᠶᠠᠯᠭᠤᠨᠤ ᠭᠠᠵᠠᠷᠤᠨ ᠵᠢᠷᠤᠭᠤᠨ ᠪᠠᠢᠴᠠᠭᠠᠯᠲᠠᠶᠢᠨ ᠠᠵᠢᠯᠢ ᠠᠩᠬᠠ ᠭᠠᠷᠳᠠᠨ ᠬᠢᠭᠰᠡᠨ ᠴᠸᠨ ᠨᠠᠢ ᠱᠢᠶᠦ᠋ᠩ ᠫᠷᠤᠹᠧᠰᠰᠤᠷᠢ ᠳᠤᠷᠠᠰᠤᠨ ᠰᠠᠨᠠᠭᠠᠯᠵᠠᠭᠰᠠᠨ ᠡᠷᠳᠡᠮ ᠱᠢᠨᠵᠢᠯᠡᠭᠡᠨᠤ ᠠᠵᠢᠯᠯᠠᠭᠠ ᠶᠠᠪᠤᠭᠳᠠᠭᠤᠯᠤᠭᠰᠠᠨ ᠪᠠᠢᠨᠠ᠃
ᠥᠪᠦᠷ ᠮᠣᠩᠭᠤᠯᠤᠨ ᠡᠳᠦᠷᠦᠨ ᠰᠣᠨᠢᠨᠠᠴᠠ ᠱᠢᠯᠵᠢᠭᠦᠯᠦᠨ ᠨᠡᠢᠲᠡᠯᠡᠪᠡ
ᠰᠤᠷᠪᠤᠯᠵᠢᠯᠠᠭᠴᠢ᠄ ᠮᠥᠷᠡᠨ