—— 《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠴᠤᠪᠤᠷᠠᠯ ᠨᠣᠮ (20 ᠪᠣᠳᠢ)ᠢ ᠠᠩᠬᠠᠯᠠᠨ ᠲᠠᠷᠬᠠᠭᠠᠬᠤ ᠵᠢᠴᠢ ᠰᠤᠳᠤᠯᠤᠨ ᠶᠠᠷᠢᠯᠴᠠᠬᠤ ᠬᠤᠷᠠᠯᠠᠴᠠ
ᠵᠢᠷᠤᠮᠲᠤ (ᠥᠪᠦᠷ ᠮᠣᠩᠭᠤᠯᠤᠨ ᠠᠷᠠᠳᠤᠨ ᠬᠡᠪᠯᠡᠯᠦᠨ ᠬᠣᠷᠢᠶᠠᠶᠢᠨ ᠬᠣᠷᠢᠶᠠᠨ ᠳᠠᠷᠤᠭᠠ)᠄
ᠤᠩᠱᠢᠭᠴᠢᠳᠤᠨ ᠱᠠᠭᠠᠷᠳᠠᠯᠭᠠᠶᠢ ᠬᠠᠩᠭᠠᠬᠤ ᠱᠢᠯᠢᠳᠡᠭ ᠪᠦᠲᠦᠭᠡᠯᠢ ᠬᠡᠪᠯᠡᠭᠦᠯᠦᠨ ᠨᠠᠢᠷᠠᠭᠤᠯᠬᠤ ᠪᠤᠯ ᠮᠠᠨᠤ ᠬᠡᠪᠯᠡᠯᠦᠨ ᠬᠣᠷᠢᠶᠠᠶᠢᠨ ᠬᠢᠨᠤ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ ᠮᠥᠨ᠃ ᠲᠤᠰ ᠴᠤᠪᠤᠷᠠᠯ ᠨᠣᠮᠢ ᠨᠠᠢᠷᠠᠭᠤᠯᠬᠤᠠᠴᠠ ᠡᠮᠦᠨᠠ ᠪᠢᠳᠡ ᠲᠤᠰ ᠲᠣᠮᠤ ᠢᠨᠵᠧᠨᠧᠷᠢᠩᠢ ᠡᠷᠬᠢᠯᠡᠵᠦ ᠳᠡᠢᠯᠬᠦ᠂ ᠵᠣᠬᠢᠶᠠᠨ ᠪᠠᠢᠭᠤᠯᠬᠤ ᠴᠢᠳᠠᠪᠦᠷᠢᠲᠠᠢ᠂ ᠤᠷᠢᠶᠠᠯᠠᠭᠠᠶᠢᠨ ᠬᠦᠴᠦᠨᠲᠠᠢ ᠰᠣᠶᠤᠯᠤᠨ ᠨᠢᠭᠡᠳᠦᠭᠡᠷ ᠹᠷᠤᠨᠲᠲᠤ ᠠᠵᠢᠯᠯᠠᠵᠤ ᠪᠠᠢᠭᠠ ᠰᠤᠳᠤᠯᠭᠠᠲᠠᠨ ᠰᠡᠴᠡᠨᠮᠦ᠋ᠩᠬᠡ ᠫᠷᠤᠹᠧᠰᠰᠤᠷᠢ ᠡᠷᠢᠭᠰᠡᠨᠶᠤᠮ᠃ ᠲᠡᠭᠡᠭᠡᠳ ᠲᠡᠭᠦᠨᠢᠶᠡᠷ ᠭᠣᠤᠯ ᠨᠠᠢᠷᠠᠭᠤᠯᠤᠭᠴᠢᠶᠢᠨ ᠠᠵᠢᠯᠢ ᠬᠠᠷᠢᠭᠤᠴᠠᠭᠤᠯᠵᠤ᠂ 《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠶᠢᠨ ᠲᠥᠷᠦᠯ ᠵᠦᠢᠯᠢ ᠲᠥᠰᠦᠪᠯᠡᠵᠦ ᠮᠡᠳᠡᠭᠦᠯᠬᠦᠪᠡᠷ ᠡᠴᠦᠰᠲᠤᠪᠠᠨ ᠰᠠᠨᠠᠯ ᠨᠢᠭᠡᠳᠪᠡ᠃ ᠲᠥᠰᠦᠪᠯᠡᠵᠦ ᠮᠡᠳᠡᠭᠦᠯᠬᠦᠪᠡᠷ ᠡᠴᠦᠰᠳᠡᠭᠡᠨ ᠰᠠᠨᠠᠯ ᠨᠢᠭᠡᠳᠪᠡ᠃
ᠲᠤᠰ ᠲᠥᠷᠦᠯ ᠵᠦᠢᠯᠢ ᠮᠡᠳᠡᠭᠦᠯᠬᠦ ᠪᠠ ᠬᠡᠷᠡᠭᠵᠢᠭᠦᠯᠬᠦ ᠳᠤᠮᠳᠠ᠂ ᠰᠡᠴᠡᠨᠮᠦ᠋ᠩᠬᠡ ᠫᠷᠤᠹᠧᠰᠰᠤᠷ ᠨᠠᠢᠷᠠᠭᠤᠯᠤᠭᠴᠢᠶᠢᠨ ᠡᠩᠨᠡᠭᠡ ᠪᠠᠢᠭᠤᠯᠤᠨ᠂ ᠳᠤᠮᠳᠠᠳᠤ᠂ ᠮᠣᠩᠭᠤᠯ᠂ ᠣᠷᠤᠰ ᠵᠡᠷᠭᠡ ᠤᠯᠤᠰᠤᠨ ᠲᠤᠰᠭᠠᠢ ᠮᠡᠷᠭᠡᠵᠢᠯᠲᠡᠨ ᠰᠤᠳᠤᠯᠭᠠᠲᠠᠳᠢ ᠴᠤᠭᠯᠠᠭᠤᠯᠵᠤ᠂ ᠬᠦᠳᠦᠯᠪᠦᠷᠢ ᠨᠠᠢᠷᠠᠭᠤᠯᠤᠨ᠂ ᠨᠠᠢᠷᠠᠭᠤᠯᠬᠤ ᠠᠵᠢᠯ ᠪᠠ ᠬᠠᠷᠭᠤᠭᠤᠯᠬᠤ ᠠᠵᠢᠯᠤᠨ ᠲᠠᠯᠠᠪᠠᠷ ᠶᠡᠬᠡ ᠬᠡᠮᠵᠢᠶᠡᠨᠤ ᠠᠵᠢᠯᠢ ᠬᠠᠷᠢᠭᠤᠴᠠᠵᠤ᠂ ᠠᠬᠢᠴᠠᠶᠢ ᠲᠦᠷᠭᠡᠳᠭᠡᠨ᠂ ᠶᠠᠰᠤ ᠴᠢᠨᠠᠷᠢ ᠳᠡᠭᠡᠭᠱᠢᠯᠡᠭᠦᠯᠵᠦ᠂ ᠢᠳᠡᠪᠬᠢ ᠴᠢᠷᠮᠠᠢᠯᠭᠠ ᠭᠠᠷᠭᠠᠭᠰᠠᠨ ᠪᠢᠯᠡ᠃
ᠲᠥᠷᠦᠯ ᠵᠦᠢᠯᠦᠨ ᠠᠵᠢᠯᠢ ᠬᠡᠷᠡᠭᠵᠢᠭᠦᠯᠬᠦ ᠳᠤᠮᠳᠠᠪᠠᠨ ᠪᠢᠳᠡ᠂ ᠤᠯᠤᠰᠤᠨ ᠨᠣᠮ ᠪᠢᠴᠢᠭ ᠬᠡᠪᠯᠡᠯᠤᠨ ᠬᠠᠤᠯᠢ ᠴᠠᠭᠠᠵᠠ ᠬᠠᠤᠯᠢ ᠲᠣᠭᠲᠠᠭᠠᠯ ᠪᠠ ᠤᠯᠤᠰᠤᠨ ᠬᠡᠪᠯᠡᠯᠦᠨ ᠰᠠᠭᠤᠷᠢ ᠮᠥᠩᠭᠦᠶᠢᠨ ᠬᠠᠮᠢᠶᠠᠷᠤᠯᠲᠠᠶᠢᠨ ᠲᠣᠭᠲᠠᠭᠠᠯᠢ ᠦᠨᠳᠦᠰᠦᠯᠡᠨ᠂ ᠬᠠᠮᠢᠶᠠᠷᠤᠯᠲᠠᠶᠢᠨ ᠺᠣᠮᠢᠰ᠂ ᠨᠠᠢᠷᠠᠭᠤᠯᠬᠤ ᠺᠣᠮᠢᠰ ᠪᠠᠢᠭᠤᠯᠵᠤ᠂ ᠤᠯᠤᠰᠤᠨ ᠳᠤᠲᠤᠭᠠᠲᠤ ᠭᠠᠳᠠᠭᠠᠲᠤᠶᠢᠨ ᠨᠡᠷᠡᠲᠤ ᠲᠤᠰᠭᠠᠢ ᠮᠡᠷᠭᠡᠵᠢᠯᠲᠡᠨ ᠰᠤᠳᠤᠯᠭᠠᠲᠠᠳ᠂ ᠵᠣᠬᠢᠶᠠᠯᠴᠢᠳᠢᠶᠠᠷ ᠪᠦᠷᠢᠯᠳᠦᠭᠰᠡᠨ ᠲᠤᠰᠭᠠᠢ ᠮᠡᠷᠭᠡᠵᠢᠯᠲᠡᠳᠦᠨ ᠺᠣᠮᠢᠰᠢ ᠪᠠᠢᠭᠤᠯᠵᠤ᠂ ᠬᠠᠮᠢᠶᠠ ᠪᠦᠬᠦᠢ ᠳᠦᠷᠢᠮ ᠲᠣᠭᠲᠠᠭᠠᠯ ᠲᠣᠭᠲᠠᠭᠠᠵᠤ᠂ ᠠᠷᠭᠠ ᠠᠪᠴᠠᠯ ᠬᠡᠷᠡᠭᠵᠢᠭᠦᠯᠵᠤ᠂ ᠲᠥᠷᠦᠯ ᠵᠦᠢᠯᠦᠨ ᠠᠵᠢᠯᠤᠨ ᠤᠷᠤᠭᠱᠢᠲᠠᠢ᠂ ᠥᠨᠳᠦᠷ ᠪᠦᠲᠦᠮᠵᠢᠲᠡᠢᠪᠡᠷ ᠠᠬᠢᠬᠤᠳᠤ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠᠶᠢᠨ ᠪᠠᠲᠤᠯᠠᠭᠠ ᠪᠠ ᠳᠦᠷᠢᠮᠦᠨ ᠪᠠᠲᠤᠯᠠᠭᠠ ᠬᠠᠩᠭᠠᠵᠠᠢ᠃
ᠲᠤᠰ ᠴᠤᠪᠤᠷᠠᠯ ᠪᠢᠴᠢᠭᠤᠨ ᠠᠭᠤᠯᠭᠠᠶᠢᠨ ᠬᠣᠯᠪᠤᠭᠳᠠᠬᠤ ᠬᠦᠷᠢᠶᠡ ᠬᠡᠪᠴᠢᠶᠡ ᠥᠷᠭᠡᠨ᠂ ᠴᠠᠭᠤᠨ ᠠᠯᠤᠰᠯᠠᠯ ᠤᠷᠲᠤ᠂ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠲᠡᠦᠬᠡᠨᠳᠡᠬᠢ ᠬᠥᠱᠢᠶᠡ ᠳᠤᠷᠠᠰᠭᠠᠯ ᠪᠣᠯᠬᠤᠢᠴᠠ ᠲᠣᠮᠤ ᠢᠨᠵᠧᠨᠧᠷᠢᠩ ᠮᠥᠨ᠃ ᠪᠤᠲᠠᠲᠠᠢ ᠬᠡᠷᠡᠭᠵᠢᠭᠦᠯᠬᠦ ᠶᠠᠪᠤᠴᠠᠳᠤᠪᠠᠨ ᠪᠢᠳᠡ ᠡᠬᠡ ᠪᠢᠴᠢᠭᠦᠨ ᠠᠭᠤᠯᠭᠠᠶᠢᠨ ᠪᠣᠭᠤᠮᠲᠠ ᠪᠠ ᠨᠠᠢᠷᠠᠭᠤᠯᠵᠤ ᠬᠠᠷᠭᠤᠭᠤᠯᠬᠤ ᠶᠠᠰᠤ ᠴᠢᠨᠠᠷᠤᠨ ᠪᠣᠭᠤᠮᠲᠠᠶᠢ ᠴᠢᠩᠭᠠ ᠰᠠᠬᠢᠵᠤ᠂ ᠭᠤᠷᠪᠠᠨ ᠬᠢᠨᠠᠯᠲᠠᠶᠢᠨ ᠳᠦᠷᠢᠮᠢᠶᠡᠷ ᠠᠵᠢᠯᠯᠠᠵᠤ᠂ ᠠᠭᠤᠯᠭᠠᠶᠢᠨ ᠶᠠᠰᠤ ᠴᠢᠨᠠᠷᠢ ᠪᠠᠲᠤᠲᠠᠢ ᠳᠡᠭᠡᠭᠱᠢᠯᠡᠭᠦᠯᠵᠡᠢ᠃
ᠬᠠᠷᠭᠤᠭᠤᠯᠬᠤ ᠠᠵᠢᠯ ᠳᠤᠮᠳᠠᠪᠠᠨ ᠪᠢᠳᠡ 《ᠮᠣᠩᠭᠤᠯ ᠵᠥᠪ ᠪᠢᠴᠢᠯᠭᠡᠶᠢᠨ ᠲᠣᠯᠢ》 ᠶᠢ ᠴᠢᠩᠭᠠ ᠵᠢᠷᠤᠮᠯᠠᠨ᠂ ᠬᠤᠪᠢᠶᠠᠵᠤ ᠬᠠᠷᠭᠤᠭᠤᠯᠬᠤ᠂ ᠰᠣᠯᠢᠵᠤ ᠬᠠᠷᠭᠤᠭᠤᠯᠬᠤ᠂ ᠮᠠᠱᠢᠨᠢᠶᠠᠷ ᠬᠠᠷᠭᠤᠭᠤᠯᠬᠤ ᠵᠡᠷᠭᠡ ᠤᠯᠠᠨ ᠵᠦᠢᠯᠦᠨ ᠠᠷᠭᠠ ᠠᠪᠴᠠᠯᠢᠶᠠᠷ ᠡᠬᠡ ᠪᠢᠴᠢᠭ ᠪᠦᠷᠢᠶᠢ 5 ᠤᠳᠠᠭᠠ ᠬᠠᠷᠭᠤᠭᠤᠯᠤᠭᠰᠠᠨ ᠪᠠᠢᠨᠠ᠃
ᠪᠠᠷ ᠬᠡᠪᠯᠡᠯᠢᠶᠡᠨ ᠲᠣᠭᠲᠠᠭᠠᠵᠤ᠂ ᠴᠢᠮᠡᠭᠯᠡᠵᠤ ᠲᠥᠰᠦᠪᠯᠡᠬᠦ᠂ ᠮᠠᠲᠧᠷᠢᠶᠠᠯ ᠰᠣᠩᠭᠤᠨ ᠬᠡᠷᠡᠭᠯᠡᠬᠦᠳᠤᠪᠠᠨ ᠪᠦᠷ ᠤᠷᠠᠨ ᠵᠣᠬᠢᠶᠠᠯᠤᠨ ᠪᠦᠲᠦᠭᠡᠯᠦᠨ ᠣᠨᠴᠠᠯᠢᠭᠢ ᠳᠣᠪᠤᠢᠯᠭᠠᠭᠰᠠᠨᠤ ᠬᠠᠮᠲᠤ ᠠᠯᠢ ᠴᠢᠳᠠᠬᠤᠪᠠᠷ ᠵᠠᠷᠤᠳᠠᠯᠢᠶᠠᠨ ᠠᠷᠪᠢᠯᠠᠵᠤ᠂ ᠥᠪᠡᠷᠦᠨ ᠦᠷᠳᠡᠭᠢᠶᠡᠨ ᠪᠠᠭᠤᠷᠠᠭᠤᠯᠤᠨ᠂ ᠰᠠᠭᠤᠷᠢ ᠮᠥᠩᠭᠦᠨᠤ ᠳᠡᠮᠵᠢᠯᠭᠡᠶᠢᠨ ᠲᠥᠷᠦᠯ ᠵᠦᠢᠯᠦᠨ ᠨᠡᠢᠲᠡᠶᠢᠨ ᠠᠰᠠᠷᠠᠮᠵᠢᠶᠢᠨ ᠱᠢᠨᠵᠢᠶᠢ ᠦᠨᠡᠨᠬᠦ ᠢᠯᠡᠷᠡᠭᠦᠯᠦᠭᠰᠡᠨ ᠪᠠᠢᠨᠠ᠃
ᠲᠥᠷᠦᠯ ᠵᠦᠢᠯᠢ ᠬᠡᠷᠡᠭᠵᠢᠭᠦᠯᠬᠦ ᠶᠠᠪᠤᠴᠠᠳᠤ᠂ ᠬᠡᠪᠯᠡᠯᠦᠨ ᠪᠦᠯᠦᠭᠯᠡᠯ᠂ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠤᠨᠤ ᠰᠣᠨᠢᠨ ᠮᠡᠳᠡᠭᠡ ᠬᠡᠪᠯᠡᠯᠦᠨ ᠲᠣᠪᠴᠢᠶᠠ ᠪᠠ ᠤᠯᠤᠰᠤᠨ ᠬᠡᠪᠯᠡᠯᠦᠨ ᠰᠠᠭᠤᠷᠢ ᠮᠥᠩᠭᠦᠨᠤ ᠬᠠᠮᠢᠶᠠᠷᠤᠯᠲᠠᠶᠢᠨ ᠠᠯᠪᠠᠨ ᠭᠡᠷᠦᠨ ᠬᠠᠮᠢᠶᠠ ᠪᠦᠬᠦᠢ ᠤᠳᠤᠷᠢᠳᠤᠯᠭᠠᠨᠠᠷ ᠨᠠᠷᠢᠨ ᠨᠢᠭᠲᠠ ᠵᠢᠯᠤᠭᠤᠳᠴᠤ᠂ ᠬᠠᠯᠠᠭᠤᠨ ᠳᠡᠮᠵᠢᠯᠭᠡ ᠬᠦᠷᠲᠡᠭᠡᠭᠰᠡᠨ ᠪᠠᠢᠨᠠ᠂ ᠡᠭᠦᠨᠳᠤ ᠪᠢᠳᠡ ᠴᠢᠩ ᠰᠡᠳᠭᠢᠯᠦᠨ ᠲᠠᠯᠠᠷᠬᠠᠯᠢᠶᠠᠨ ᠳᠡᠪᠱᠢᠭᠦᠯᠦᠶᠡ᠃ ᠡᠭᠦᠨᠠᠴᠠ ᠭᠠᠳᠠᠨᠠ᠂ ᠲᠤᠰ ᠲᠥᠷᠦᠯ ᠵᠦᠢᠯᠳᠤ ᠣᠷᠤᠯᠴᠠᠭᠰᠠᠨ ᠭᠣᠤᠯ ᠨᠠᠢᠷᠠᠭᠤᠯᠤᠭᠴᠢ ᠲᠡᠷᠢᠭᠦᠲᠡᠢ ᠬᠠᠮᠢᠶᠠ ᠪᠦᠬᠦᠢ ᠲᠤᠰᠭᠠᠢ ᠮᠡᠷᠭᠡᠵᠢᠯᠲᠡᠨ᠂ ᠰᠤᠳᠤᠯᠭᠠᠲᠠᠨ᠂ ᠵᠣᠬᠢᠶᠠᠯᠴᠢ ᠵᠢᠴᠢ ᠨᠠᠢᠷᠠᠭᠤᠯᠤᠭᠴᠢ᠂ ᠬᠡᠪᠯᠡᠯᠦᠨ ᠪᠠᠷᠯᠠᠭᠴᠢᠳᠲᠤᠪᠠᠨ ᠭᠦᠨ ᠲᠠᠯᠠᠷᠬᠠᠯᠢᠶᠠᠨ ᠳᠡᠪᠱᠢᠭᠦᠯᠦᠶᠡ᠂ ᠲᠠᠨᠠᠷᠤᠨ ᠠᠷᠢᠭᠤᠨ ᠬᠥᠳᠡᠯᠮᠦᠷᠢᠶᠢᠨ ᠠᠴᠢᠪᠠᠷ ᠡᠨᠡᠬᠦ ᠲᠥᠷᠦᠯ ᠵᠦᠢᠯ ᠤᠷᠤᠭᠱᠢᠲᠠᠢ ᠶᠠᠪᠤᠭᠳᠠᠵᠤ᠂ ᠴᠢᠨᠠᠷ ᠰᠠᠢᠲᠠᠢ ᠪᠦᠲᠦᠭᠡᠯ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠰᠡᠴᠡᠨᠮᠦ᠋ᠩᠬᠡ (ᠳᠤᠮᠳᠠᠳᠤ ᠤᠯᠤᠰᠤᠨ ᠨᠡᠢᠭᠡᠮᠦᠨ ᠱᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠠᠺᠠᠳᠧᠮᠢᠶᠢᠨ ᠦᠨᠳᠦᠰᠦᠲᠡᠨᠤ ᠤᠳᠭᠠ ᠵᠣᠬᠢᠶᠠᠯ ᠰᠤᠳᠤᠯᠬᠤ ᠬᠦᠷᠢᠶᠡᠯᠡᠩᠦᠨ ᠰᠤᠳᠤᠯᠤᠭᠴᠢ᠂ ᠪᠦᠬᠦ ᠤᠯᠤᠰᠤᠨ 《ᠭᠡᠰᠡᠷ》 ᠤᠨ ᠠᠵᠢᠯᠢ ᠤᠳᠤᠷᠢᠳᠭᠤ ᠳᠤᠭᠤᠢᠯᠠᠩᠤᠨ ᠨᠠᠷᠢᠨ ᠪᠢᠴᠢᠭᠤᠨ ᠳᠠᠷᠤᠭᠠ)᠄
《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠭᠡᠬᠦ ᠨᠣᠮ ᠪᠤᠯ ᠤᠯᠤᠰᠤᠨ ᠬᠡᠪᠯᠡᠯᠦᠨ ᠰᠠᠭᠤᠷᠢ ᠮᠥᠩᠭᠦᠶᠢᠨ ᠲᠥᠰᠦᠪᠢᠶᠡᠷ ᠬᠢᠭᠰᠡᠨ ᠨᠣᠮ ᠪᠣᠯᠬᠤᠶᠤᠮ᠃ ᠲᠤᠰ ᠨᠣᠮ ᠪᠤᠯ ᠤᠯᠠᠨ ᠤᠯᠤᠰᠤᠨ ᠵᠢᠱᠢᠭ ᠪᠣᠯᠤᠭᠰᠠᠨ ᠠᠷᠭᠠᠪᠠᠷ ᠲᠥᠷᠦᠯ ᠬᠤᠪᠢᠶᠠᠭᠰᠠᠨ᠂ ᠨᠡᠢᠲᠡ 26 ᠲᠥᠷᠦᠯᠢᠶᠡᠷ ᠠᠩᠭᠢᠯᠠᠭᠰᠠᠨ᠂ ᠱᠢᠠᠲᠸᠮᠵᠢᠬᠦᠯᠵᠦ ᠬᠤᠷᠢᠶᠠᠩᠭᠤᠢᠯᠠᠵᠤ ᠬᠢᠭᠰᠡᠨ ᠨᠣᠮ ᠪᠣᠯᠤᠨᠠ᠃ ᠲᠤᠰ ᠨᠣᠮᠨᠢ ᠬᠦᠨᠴᠡᠪᠡᠷᠢᠶᠡᠨ 800 ᠵᠢᠯᠤᠨ ᠤᠷᠲᠦ ᠤᠳᠠᠭᠠᠨ ᠲᠡᠦᠬᠡᠨ ᠶᠠᠪᠤᠴᠠᠳᠡᠬᠢ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠢ ᠬᠠᠮᠤᠷᠴᠤ᠂ ᠥᠷᠭᠡᠴᠡᠪᠡᠷᠢᠶᠡᠨ ᠳᠤᠮᠳᠠᠳᠤ᠂ ᠮᠣᠩᠭᠤᠯ᠂ ᠣᠷᠤᠰᠲᠤ ᠣᠷᠤᠱᠢᠨ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠮᠣᠩᠭᠤᠯ ᠦᠨᠳᠦᠰᠦᠲᠡᠨᠤ ᠪᠢᠴᠢᠭᠤᠨ ᠵᠣᠬᠢᠶᠠᠯ ᠪᠣᠯᠤᠨ ᠠᠮᠠᠨ ᠵᠣᠬᠢᠶᠠᠯᠠᠴᠠ ᠱᠢᠭᠱᠢᠨ ᠰᠣᠩᠭᠤᠯᠲᠠ ᠬᠢᠵᠤ ᠬᠡᠪᠯᠡᠯᠳᠤᠪᠠᠨ ᠬᠠᠮᠤᠷᠤᠭᠤᠯᠤᠭᠰᠠᠨ ᠪᠠᠢᠨᠠ᠃ ᠡᠭᠦᠨᠢᠶᠡᠷ ᠪᠠᠷᠠᠬᠤᠦᠭᠡᠢ᠂ ᠠᠯᠲᠠᠢ ᠢᠵᠠᠭᠤᠷ ᠬᠡᠯᠡᠲᠡᠨᠤ ᠳᠤᠮᠳᠠ ᠨᠡᠢᠳᠡᠮ ᠲᠠᠷᠬᠠᠭᠰᠠᠨ 《ᠠᠮᠠᠨ ᠴᠠᠭᠠᠨ ᠪᠢᠷᠠᠭᠤ》 ᠵᠡᠷᠭᠡ ᠪᠦᠲᠦᠭᠡᠯᠢᠴᠤ ᠪᠦᠷ ᠲᠤᠰ ᠨᠣᠮᠳᠤᠪᠠᠨ ᠣᠷᠤᠭᠤᠯᠵᠤ ᠬᠡᠪᠯᠡᠭᠦᠯᠦᠭᠰᠡᠨ ᠪᠠᠢᠨᠠ᠃
ᠡᠢᠮᠦ ᠪᠣᠯᠬᠤᠷ ᠲᠤᠰ ᠴᠤᠪᠤᠷᠠᠯ ᠪᠢᠴᠢᠭᠢ ᠪᠢᠳᠡ ᠡᠮᠦᠨᠡᠬᠢ ᠨᠣᠮᠤ᠋ᠳᠠᠴᠠ ᠳᠠᠪᠠᠭᠰᠠᠨ᠂ ᠱᠢᠨᠡ ᠴᠠᠭ ᠦᠶᠡᠶᠢ ᠬᠠᠷᠠᠭᠤᠯᠤᠭᠰᠠᠨ᠂ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠬᠥᠭᠵᠢᠯᠲᠡᠶᠢ ᠬᠠᠷᠠᠭᠤᠯᠤᠭᠰᠠᠨ ᠨᠣᠮ ᠪᠦᠲᠦᠭᠡᠯ ᠪᠣᠯᠭᠠᠬᠤᠪᠠᠷ ᠴᠢᠷᠮᠠᠢᠭᠰᠠᠨ᠃ ᠶᠡᠷᠦᠩᠬᠡᠢᠯᠡᠭᠡᠳ ᠭᠡᠯᠡᠪᠡᠯ᠂ ᠲᠤᠰ ᠪᠦᠲᠦᠭᠡᠯᠢ ᠪᠢᠳᠡ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠶᠡᠷᠦᠩᠬᠡᠢ ᠳᠦᠷᠢ ᠳᠦᠷᠬᠦᠶᠢ ᠬᠠᠷᠠᠭᠤᠯᠵᠤ ᠴᠢᠳᠠᠭᠰᠠᠨ ᠪᠦᠲᠦᠭᠡᠯ ᠪᠣᠯᠭᠠᠬᠤᠪᠠᠷ ᠲᠦᠯᠦᠪᠯᠡᠵᠤ ᠬᠢᠭᠰᠡᠨ᠂ ᠴᠢᠷᠮᠠᠢᠵᠤ ᠬᠢᠭᠰᠡᠨ᠃
ᠮᠡᠳᠡᠭᠡᠵᠢᠪᠡᠷ᠂ ᠡᠢᠮᠦ ᠲᠣᠮᠤ ᠨᠣᠮᠢ ᠬᠢᠬᠦᠳᠤ ᠠᠯᠳᠠᠭᠠ ᠮᠠᠳᠠᠭᠲᠠᠢ ᠵᠦᠢᠯ ᠭᠠᠷᠬᠤᠦᠭᠡᠢ ᠭᠡᠵᠤ ᠪᠠᠢᠬᠤᠦᠭᠡᠢ᠃ ᠡᠭᠦᠨᠢ ᠬᠣᠵᠢᠮᠤᠨ ᠵᠠᠯᠠᠭᠤᠴᠤᠳ ᠤᠯᠠᠮᠢᠶᠠᠷ ᠲᠡᠭᠦᠯᠳᠡᠷᠵᠢᠬᠦᠯᠵᠤ᠂ ᠡᠭᠦᠨᠢᠶᠡᠷ ᠰᠠᠭᠤᠷᠢ ᠪᠣᠯᠭᠠᠵᠤ᠂ ᠡᠭᠦᠨᠡᠴᠡ ᠨᠡᠩ ᠶᠡᠬᠡ ᠰᠠᠢᠬᠠᠨ ᠨᠣᠮ᠂ ᠲᠣᠮᠤ ᠪᠦᠲᠦᠭᠡᠯᠢ ᠬᠡᠪᠯᠡᠭᠦᠯᠬᠦᠶᠢ ᠬᠦᠰᠡᠵᠤ ᠪᠠᠢᠨᠠ᠃
ᠡᠷᠬᠢᠮᠪᠠᠶᠠᠷ (ᠥᠪᠦᠷ ᠮᠣᠩᠭᠤᠯᠤᠨ ᠶᠡᠬᠡ ᠰᠤᠷᠭᠠᠭᠤᠯᠢᠶᠢᠨ ᠫᠷᠤᠹᠧᠰᠰᠤᠷ)᠄
《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠬᠡᠪᠯᠡᠭᠳᠡᠭᠰᠡᠨᠨᠢ ᠮᠣᠩᠭᠤᠯ ᠰᠤᠳᠤᠯᠤᠯᠤᠨ ᠬᠦᠷᠢᠶᠡᠨᠤ ᠬᠢᠨ ᠵᠢᠴᠢ ᠶᠡᠬᠡ ᠳᠡᠭᠡᠲᠦ ᠰᠤᠷᠭᠠᠭᠤᠯᠢᠶᠢᠨ ᠵᠢᠭᠠᠨ ᠰᠤᠷᠭᠠᠯᠲᠠ ᠪᠠ ᠰᠤᠳᠤᠯᠭᠠᠨᠤ ᠠᠵᠢᠯᠤᠨ ᠨᠢᠭᠡᠨ ᠪᠠᠶᠠᠷᠯᠠᠭᠤᠱᠢᠲᠠᠢ ᠶᠠᠪᠤᠳᠠᠯ ᠪᠣᠯᠬᠤᠶᠤᠮ᠃
ᠲᠤᠰ ᠪᠦᠲᠦᠭᠡᠯᠢ ᠬᠡᠪᠯᠡᠵᠤ ᠲᠠᠷᠬᠠᠭᠠᠬᠤ ᠠᠵᠢᠯ ᠪᠤᠯ ᠨᠢᠭᠡᠨ ᠲᠣᠮᠤ ᠢᠨᠵᠧᠨᠧᠷᠢᠩ ᠪᠣᠯᠤᠨᠠ᠃ ᠲᠤᠰ ᠨᠣᠮᠤᠨ ᠬᠡᠪᠯᠡᠭᠳᠡᠭᠰᠡᠨᠨᠢ ᠮᠣᠩᠭᠤᠯ ᠰᠣᠶᠤᠯ᠂ ᠢᠯᠠᠩᠭᠤᠶᠠ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠰᠤᠳᠤᠯᠭᠠᠨ᠂ ᠵᠢᠭᠠᠨ ᠰᠤᠷᠭᠠᠯᠲᠠ ᠪᠠ ᠪᠦᠬᠦᠢᠯᠡ ᠮᠣᠩᠭᠤᠯ ᠰᠤᠳᠤᠯᠤᠯᠤᠨ ᠠᠵᠢᠯᠳᠤ ᠪᠦᠷ ᠴᠢᠬᠤᠯᠠ ᠠᠴᠢ ᠬᠣᠯᠪᠤᠭᠳᠠᠯᠲᠠᠢ᠃
ᠨᠢᠭᠡᠳᠤ᠂ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠰᠤᠳᠤᠯᠤᠯᠢ ᠲᠦᠯᠬᠢᠨ ᠠᠬᠢᠭᠤᠯᠤᠭᠰᠠᠨ ᠪᠠᠢᠨᠠ᠃ ᠲᠤᠰ ᠨᠣᠮᠨᠢ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠰᠤᠳᠤᠯᠤᠯᠳᠤ ᠵᠠᠩᠭᠢᠯᠠᠭᠠᠶᠢᠨ ᠦᠢᠯᠡᠳᠦᠯ ᠦᠵᠡᠬᠦᠯᠵᠤ᠂ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠢ ᠪᠦᠬᠦ ᠲᠠᠯᠠᠠᠴᠠ ᠬᠠᠷᠠᠭᠤᠯᠵᠤ᠂ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠢ ᠪᠦᠬᠦ ᠲᠠᠯᠠᠪᠠᠷ ᠡᠵᠡᠮᠱᠢᠬᠦᠳᠤ ᠠᠱᠢᠭᠲᠠᠢ ᠮᠠᠲᠧᠷᠢᠶᠠᠯ ᠬᠠᠩᠭᠠᠭᠰᠠᠨ ᠪᠠᠢᠨᠠ᠃
ᠬᠤᠶᠠᠷᠲᠤ᠂ ᠮᠣᠩᠭᠤᠯ ᠦᠭᠡ ᠬᠡᠯᠡ ᠦᠰᠦᠭ ᠪᠢᠴᠢᠭᠦᠨ ᠱᠢᠨᠵᠢᠯᠡᠭᠡᠨᠤ ᠰᠠᠯᠠᠭᠠᠶᠢ ᠲᠦᠯᠬᠢᠨ ᠠᠬᠢᠭᠤᠯᠬᠤᠳᠤ ᠠᠱᠢᠭᠲᠠᠢ᠃ ᠣᠳᠤᠬᠠᠨᠳᠤ ᠪᠦᠬᠦ ᠤᠯᠤᠰᠲᠤ ᠨᠡᠢᠲᠡ 12 ᠵᠢᠩᠬᠢᠨᠢ ᠠᠩᠭᠢᠶᠢᠨ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢᠨᠢ ᠮᠣᠩᠭᠤᠯ ᠬᠡᠯᠡ ᠤᠳᠭᠠ ᠵᠣᠬᠢᠶᠠᠯᠤᠨ ᠲᠤᠰᠭᠠᠢ ᠮᠡᠷᠭᠡᠵᠢᠯᠦᠨ ᠰᠤᠷᠤᠭᠴᠢ ᠡᠯᠰᠡᠵᠤ ᠪᠤᠢ᠂ ᠡᠭᠦᠨᠳᠤ 4 ᠶᠡᠬᠡ ᠳᠡᠭᠡᠲᠦ ᠰᠤᠷᠭᠠᠭᠤᠯᠢᠨᠢ ᠮᠣᠩᠭᠤᠯ ᠬᠡᠯᠡ ᠤᠳᠭᠠ ᠵᠣᠬᠢᠶᠠᠯᠤᠨ ᠲᠤᠰᠭᠠᠢ ᠮᠡᠷᠭᠡᠵᠢᠯᠦᠨ ᠳ᠋ᠤᠺᠲ᠋ᠤᠷᠠᠨᠲ ᠬᠦᠮᠦᠵᠢᠬᠦᠯᠵᠤ ᠪᠤᠢ᠃ ᠡᠨᠡᠬᠦ ᠨᠣᠮ ᠶᠡᠬᠡ ᠲᠡᠭᠡᠳᠦ ᠰᠤᠷᠭᠠᠭᠤᠯᠢᠶᠢᠨ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠵᠢᠭᠠᠨ ᠰᠤᠷᠭᠠᠯᠲᠠ᠂ ᠡᠷᠳᠡᠮ ᠱᠢᠨᠵᠢᠯᠡᠭᠡᠨᠤ ᠠᠵᠢᠯᠳᠤ ᠲᠦᠯᠬᠢᠴᠡ ᠦᠢᠯᠡᠳᠦᠯ ᠦᠵᠡᠭᠦᠯᠬᠦᠨᠢ ᠯᠠᠪᠲᠠᠢ᠂ ᠲᠤᠰ ᠪᠦᠲᠦᠭᠡᠯᠡᠴᠡ ᠰᠤᠷᠤᠭᠴᠢᠳ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠢ ᠬᠦᠨᠵᠡᠬᠡᠢ ᠣᠢᠯᠠᠭᠠᠵᠤ᠂ ᠪᠠᠭᠱᠢᠨᠠᠷ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠲᠤᠬᠠᠢ ᠨᠠᠩ ᠬᠦᠨᠵᠡᠭᠡᠢ ᠰᠤᠳᠤᠯᠭᠠᠨ ᠥᠷᠨᠢᠭᠦᠯᠬᠦ ᠪᠣᠯᠤᠨᠠ᠃
ᠭᠤᠷᠪᠠᠳᠤ᠂ ᠮᠣᠩᠭᠤᠯ ᠰᠤᠳᠤᠯᠤᠯᠤᠨ ᠤᠯᠠᠨ ᠤᠯᠤᠰᠤᠨ ᠬᠠᠷᠢᠯᠴᠠᠭᠠᠶᠢ ᠲᠦᠯᠬᠢᠨ ᠠᠬᠢᠭᠤᠯᠬᠤ ᠪᠣᠯᠤᠨᠠ᠃ ᠣᠳᠤᠬᠠᠨᠳᠤ ᠳᠡᠯᠡᠬᠡᠢ ᠳᠡᠭᠡᠷᠡ ᠠᠷᠪᠠᠭᠠᠳ ᠤᠯᠤᠰᠲᠤ ᠮᠣᠩᠭᠤᠯ ᠰᠤᠳᠤᠯᠤᠯᠤᠨ ᠬᠠᠮᠢᠶᠠ ᠪᠦᠬᠦᠢ ᠪᠠᠢᠭᠤᠯᠤᠮᠵᠢ ᠪᠠᠢᠳᠠᠭ᠃ ᠡᠨᠡᠬᠦ ᠨᠣᠮᠨᠢ ᠲᠡᠳᠡᠨᠦᠰᠤᠨ ᠭᠠᠷ ᠠᠪᠤᠯᠭᠠᠶᠢᠨ ᠰᠠᠢᠨ ᠨᠣᠮ ᠪᠣᠯᠬᠤ ᠪᠥᠭᠡᠳ ᠲᠥᠷᠦᠯ ᠠᠩᠭᠢᠯᠠᠯ ᠬᠤᠪᠢᠶᠠᠵᠤ᠂ ᠮᠠᠲᠧᠷᠢᠶᠠᠯ ᠴᠤᠭᠯᠠᠭᠤᠯᠬᠤ ᠲᠦᠪᠡᠭ ᠠᠰᠠᠭᠤᠳᠠᠯᠢ ᠢᠯᠭᠤᠮ ᠱᠢᠢᠳᠪᠦᠷᠢᠯᠡᠵᠤ ᠥᠭᠬᠦ ᠪᠣᠯᠤᠨᠠ᠃
ᠳᠥᠷᠪᠡᠳᠤ᠂ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠲᠡᠦᠬᠡᠶᠢᠨ ᠮᠠᠲᠧᠷᠢᠶᠠᠯᠤᠨ ᠴᠣᠭᠴᠠᠯᠠᠯᠲᠠᠶᠢ ᠲᠦᠯᠬᠢᠨ ᠠᠬᠢᠭᠤᠯᠤᠨᠠ᠃ ᠤᠷᠠᠨ ᠵᠣᠬᠢᠶᠠᠯᠤᠨ ᠪᠦᠲᠦᠭᠡᠯ ᠲᠤᠰ ᠪᠡᠶᠡᠪᠡᠷᠢᠶᠠᠨ ᠲᠡᠦᠬᠡᠶᠢᠨ ᠮᠠᠲᠧᠷᠢᠶᠠᠯᠤᠨ ᠨᠢᠭᠡᠨ ᠴᠢᠬᠤᠯᠠ ᠪᠦᠷᠢᠯᠳᠦᠬᠦᠨ ᠬᠡᠰᠡᠭ ᠪᠣᠯᠤᠨᠠ᠃ ᠲᠤᠰ ᠨᠣᠮᠤᠨ ᠬᠡᠪᠯᠡᠭᠳᠡᠭᠰᠡᠨᠨᠢ ᠲᠡᠦᠬᠡᠶᠢᠨ ᠮᠠᠲᠧᠷᠢᠶᠠᠯᠤᠨ ᠱᠢᠨᠵᠢᠯᠡᠭᠡᠨᠤ ᠲᠥᠷᠦᠯᠦᠨ ᠬᠥᠭᠵᠢᠯᠲᠡᠶᠢ ᠪᠦᠲᠦᠮᠵᠢᠲᠡᠢ ᠲᠦᠯᠬᠢᠨ ᠠᠬᠢᠭᠤᠯᠬᠤ ᠪᠣᠯᠤᠨᠠ᠃
ᠳᠤᠯᠠᠭᠠᠨ (ᠪᠡᠭᠡᠵᠢᠩ ᠶᠡᠬᠡ ᠰᠤᠷᠭᠠᠭᠤᠯᠢᠶᠢᠨ ᠳᠣᠷᠤᠨᠠᠳᠠᠬᠢᠨᠤ ᠤᠳᠭᠠ ᠵᠣᠬᠢᠶᠠᠯ ᠰᠤᠳᠤᠯᠤᠯᠤᠨ ᠲᠥᠪᠦᠨ ᠫᠷᠤᠹᠧᠰᠰᠤᠷ)᠄
ᠰᠡᠴᠡᠨᠮᠦ᠋ᠩᠬᠡ ᠫᠷᠤᠹᠧᠰᠰᠤᠷᠤᠨ ᠡᠷᠬᠢᠯᠡᠵᠤ ᠨᠠᠢᠷᠠᠭᠤᠯᠤᠭᠰᠠᠨ 《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠭᠡᠬᠦ ᠴᠤᠪᠤᠷᠠᠯ ᠨᠣᠮᠤᠨ 20 ᠪᠣᠳᠢᠶᠢ ᠪᠢ ᠳᠣᠤᠷᠠᠬᠢ ᠭᠤᠷᠪᠠᠨ ᠲᠠᠯᠠᠠᠴᠠ ᠠᠮᠵᠢᠯᠲᠠᠲᠠᠢ ᠪᠣᠯᠤᠯᠠ ᠭᠡᠵᠤ ᠦᠵᠡᠵᠤ ᠪᠠᠢᠨᠠ᠃
ᠨᠢᠭᠡᠳᠤ᠂ ᠰᠡᠴᠡᠨᠮᠦ᠋ᠩᠬᠡ ᠫᠷᠤᠹᠧᠰᠰᠤᠷ ᠲᠡᠷᠢᠭᠦᠲᠡᠢ ᠨᠠᠢᠷᠠᠭᠤᠯᠬᠤ ᠺᠣᠮᠢᠰᠤᠨ ᠬᠢᠨ ᠲᠤᠰ ᠨᠣᠮᠢ ᠨᠠᠢᠷᠠᠭᠤᠯᠬᠤᠳᠤᠪᠠᠨ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠲᠡᠦᠬᠡ᠂ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠰᠤᠳᠤᠯᠭᠠᠨᠤ ᠦᠵᠡᠯᠲᠡ ᠪᠠ ᠤᠷᠠᠨ ᠵᠣᠬᠢᠶᠠᠯ ᠰᠤᠳᠤᠯᠭᠠᠨᠤ ᠪᠠᠷᠢᠮᠵᠢᠶᠠᠪᠡᠷ ᠵᠣᠬᠢᠶᠠᠯ ᠪᠦᠲᠦᠭᠡᠯᠢ ᠰᠣᠩᠭᠤᠭᠰᠠᠨ ᠪᠠᠢᠨᠠ᠃ ᠨᠠᠢᠷᠠᠭᠤᠯᠬᠤ ᠺᠣᠮᠢᠰᠤᠨ ᠡᠷᠳᠡᠮᠲᠡᠳ ᠲᠤᠰ ᠪᠦᠲᠦᠭᠡᠯᠦᠨ ᠵᠣᠬᠢᠶᠠᠯᠢ ᠰᠣᠩᠭᠤᠵᠤ ᠨᠠᠢᠷᠠᠭᠤᠯᠬᠤᠳᠤᠪᠠᠨ ᠵᠢᠷᠠᠭᠠᠳ ᠵᠢᠯᠤᠨ ᠲᠤᠷᠱᠢᠲᠠ ᠬᠡᠪᠯᠡᠭᠳᠡᠵᠤ ᠭᠠᠷᠤᠭᠰᠠᠨ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠲᠡᠦᠬᠡ᠂ ᠠᠷᠠᠳᠤᠨ ᠠᠮᠠᠨ ᠵᠣᠬᠢᠶᠠᠯᠤᠨ ᠲᠡᠤᠬᠡ᠂ ᠪᠢᠴᠢᠭᠤᠨ ᠤᠷᠠᠨ ᠵᠣᠬᠢᠶᠠᠯᠤᠨ ᠣᠨᠤᠯ ᠪᠣᠯᠤᠨ ᠤᠬᠠᠭᠳᠠᠬᠤᠨᠢ ᠰᠠᠢᠬᠠᠨ ᠡᠵᠡᠮᠱᠢᠵᠤ᠂ ᠤᠷᠠᠨ ᠵᠣᠬᠢᠶᠠᠯ ᠰᠤᠳᠤᠯᠭᠠᠨᠤ ᠱᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠪᠠᠷᠢᠮᠵᠢᠶᠠᠪᠠᠷ 《ᠳᠡᠭᠡᠵᠢ》 ᠪᠣᠯᠬᠤᠢᠴᠠ ᠪᠦᠲᠦᠭᠡᠯᠦ᠋ᠳᠢ ᠰᠣᠩᠭᠤᠭᠰᠠᠨ ᠪᠠᠢᠨᠠ᠃
ᠬᠤᠶᠠᠷᠲᠤ᠂ ᠳᠤᠮᠳᠠᠳᠤ ᠤᠯᠤᠰᠤᠨ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠠᠮᠵᠢᠯᠲᠠ᠂ ᠣᠨᠴᠠᠭᠠᠢᠯᠠᠨ ᠱᠢᠨᠡ ᠳᠤᠮᠳᠠᠳᠤ ᠤᠯᠤᠰ ᠪᠠᠢᠭᠤᠯᠤᠭᠳᠠᠭᠰᠠᠨᠤ ᠳᠠᠷᠠᠭᠠᠬᠢ ᠮᠣᠩᠭᠤᠯ ᠦᠨᠳᠦᠰᠦᠲᠡᠨᠤ ᠤᠷᠠᠨ ᠵᠣᠬᠢᠶᠠᠯᠤᠨ ᠨᠡᠩ ᠥᠨᠳᠦᠷ ᠠᠮᠵᠢᠯᠲᠠᠶᠢ ᠲᠤᠰᠭᠠᠭᠰᠠᠨ ᠪᠠᠢᠨᠠ᠃ 20 ᠪᠣᠳᠢ ᠨᠣᠮᠳᠤ ᠣᠷᠤᠭᠰᠠᠨ ᠪᠦᠲᠦᠭᠡᠯᠦ᠋ᠳᠢ ᠦᠵᠡᠪᠡᠯ᠂ ᠤᠯᠤᠰ ᠪᠠᠢᠭᠤᠯᠤᠭᠳᠠᠭᠰᠠᠨᠠᠴᠠ ᠨᠠᠭᠠᠱᠢᠬᠢ ᠣᠳᠤ ᠦᠶᠡᠶᠢᠨ ᠤᠷᠠᠨ ᠵᠣᠬᠢᠶᠠᠯ ᠨᠡᠩ ᠶᠡᠬᠡ ᠬᠤᠪᠢᠶᠢᠨ ᠵᠢᠩᠢ ᠡᠵᠡᠯᠡᠭᠰᠡᠨ ᠪᠠᠢᠨᠠ᠃ ᠡᠨᠡᠨᠢ ᠣᠳᠤ ᠦᠶᠡᠶᠢᠨ ᠤᠷᠠᠨ ᠵᠣᠬᠢᠶᠠᠯᠨᠢ ᠪᠦᠲᠦᠭᠡᠯᠦᠨ ᠲᠠᠯᠠᠪᠠᠷ᠂ ᠠᠭᠤᠯᠭᠠᠶᠢᠨ ᠲᠠᠯᠠᠪᠠᠷ ᠨᠡᠩ ᠥᠨᠳᠦᠷ ᠠᠮᠵᠢᠯᠲᠠ ᠣᠯᠤᠯᠠ ᠭᠡᠳᠡᠭᠢ ᠬᠠᠷᠠᠭᠤᠯᠵᠤ ᠪᠠᠢᠨᠠ᠃
ᠭᠤᠷᠪᠠᠳᠤ᠂ ᠮᠣᠩᠭᠤᠯ ᠦᠨᠳᠦᠰᠦᠲᠡᠨᠤ ᠤᠷᠠᠨ ᠵᠣᠬᠢᠶᠠᠯᠤᠨ ᠲᠡᠦᠬᠡᠶᠢ ᠱᠢᠨᠡ ᠪᠠᠢᠳᠠᠯ ᠳᠣᠤᠷᠠ ᠨᠡᠮᠡᠵᠤ ᠪᠢᠴᠢᠬᠦ᠂ ᠵᠠᠰᠠᠵᠤ ᠪᠢᠴᠢᠬᠦ᠂ ᠲᠡᠭᠦᠯᠳᠡᠷᠵᠢᠭᠦᠯᠬᠦ᠂ ᠳᠠᠬᠢᠵᠤ ᠪᠢᠴᠢᠬᠦᠳᠤ ᠡᠯᠪᠡᠭ ᠪᠠᠶᠠᠯᠢᠭ ᠮᠠᠲᠧᠷᠢᠶᠠᠯ ᠬᠠᠩᠭᠠᠭᠰᠠᠨ ᠪᠠᠢᠨᠠ᠃ ᠶᠡᠷᠦᠩᠬᠡᠢᠯᠡᠭᠡᠳ ᠬᠡᠯᠡᠪᠡᠯ᠂ ᠲᠤᠰ ᠨᠣᠮᠨᠢ ᠤᠩᠱᠢᠭᠴᠢᠳ᠂ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠰᠤᠳᠤᠯᠭᠠᠨᠤ ᠡᠷᠳᠡᠮᠳᠡᠳᠲᠤ ᠮᠠᠱᠢ ᠶᠡᠬᠡ ᠣᠶᠤᠨᠤ ᠥᠪ ᠬᠥᠷᠦᠩᠭᠡᠶᠢ ᠪᠦᠳᠦᠭᠡᠵᠤ ᠥᠭᠭᠦᠯᠡ ᠭᠡᠵᠤ ᠪᠣᠳᠤᠵᠤ ᠪᠠᠢᠨᠠ᠃
ᠵᠢᠨ ᠬᠠᠢ (ᠥᠪᠦᠷ ᠮᠣᠩᠭᠤᠯᠤᠨ ᠨᠡᠢᠭᠡᠮᠦᠨ ᠱᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠬᠦᠷᠢᠶᠡᠯᠡᠩᠦᠨ ᠳᠡᠳ ᠳᠠᠷᠤᠭᠠ)᠄
ᠰᠡᠴᠡᠨᠮᠦ᠋ᠩᠬᠡ ᠫᠷᠤᠹᠧᠰᠰᠤᠷᠤᠨ ᠭᠣᠤᠯᠯᠠᠨ ᠨᠠᠢᠷᠠᠭᠤᠯᠤᠭᠰᠠᠨ 《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠶᠢ ᠤᠷᠪᠠᠭᠤᠯᠤᠨ ᠦᠵᠡᠭᠰᠡᠨᠤ ᠳᠠᠷᠠᠭᠠ ᠳᠣᠤᠷᠠᠬᠢ ᠬᠡᠳᠦᠨ ᠰᠡᠳᠭᠢᠭᠳᠡᠯᠲᠠᠢ᠄
ᠨᠢᠭᠡᠳᠤ᠂ ᠬᠦᠷᠢᠶᠠ ᠬᠡᠪᠴᠢᠶᠠᠪᠠᠷ ᠶᠡᠬᠡ᠃ ᠲᠤᠰ ᠨᠣᠮᠨᠢ ᠬᠦᠷᠢᠶᠡ ᠬᠡᠪᠴᠢᠶᠡ᠂ ᠠᠭᠤᠯᠭᠠ᠂ ᠡᠰᠡᠭᠦᠯᠡ ᠱᠢᠰᠲᠸᠮᠲᠤ ᠴᠢᠨᠠᠷᠤᠨ ᠲᠠᠯᠠᠪᠡᠷ ᠪᠦᠷ ᠤᠤᠯᠤᠨ ᠶᠠᠮᠠᠷᠪᠠ ᠪᠦᠳᠦᠬᠡᠯᠡᠴᠡ ᠳᠠᠪᠠᠭᠰᠠᠨ ᠪᠠᠢᠨᠠ᠃
ᠬᠤᠶᠠᠷᠲᠤ᠂ ᠠᠭᠤᠯᠭᠠᠪᠡᠷ ᠪᠦᠷᠢᠨ ᠪᠦᠲᠦᠨ᠃ ᠴᠠᠭ ᠬᠤᠭᠤᠴᠠᠭᠠᠨᠤ ᠲᠠᠯᠠᠪᠠᠷ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠲᠡᠦᠬᠡᠨ ᠬᠦᠭᠵᠢᠯᠲᠠᠶᠢ ᠬᠠᠷᠠᠭᠤᠯᠵᠤ᠂ ᠠᠳᠠᠯᠢ ᠪᠤᠰᠤ ᠲᠡᠦᠬᠡᠨ ᠴᠠᠭ ᠦᠶᠡᠶᠢᠨ ᠪᠦᠲᠦᠭᠡᠯᠢ ᠬᠠᠮᠤᠷᠤᠭᠰᠠᠨ ᠪᠠᠢᠨᠠ᠃ ᠣᠷᠤᠨ ᠵᠠᠢᠶᠢᠨ ᠲᠠᠯᠠᠪᠠᠷ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠵᠣᠬᠢᠶᠠᠨ ᠪᠦᠲᠦᠭᠡᠯᠭᠡ ᠪᠠ ᠳᠠᠮᠵᠢᠭᠤᠯᠭᠠᠶᠢᠨ ᠪᠦᠬᠦᠢᠯᠡ ᠣᠷᠤᠨ ᠪᠦᠰᠡᠶᠢ ᠬᠠᠮᠤᠷᠴᠠᠢ᠂ ᠣᠨᠴᠠᠭᠠᠢᠯᠠᠨ ᠠᠷᠠᠳᠤᠨ ᠤᠳᠭᠠ ᠵᠣᠬᠢᠶᠠᠯᠤᠨ ᠪᠦᠲᠦᠭᠡᠯᠢ ᠰᠤᠩᠭᠤᠬᠤᠳᠤᠪᠠᠨ ᠳᠤᠮᠳᠠᠳᠤ ᠮᠣᠩᠭᠤᠯ᠂ ᠣᠷᠤᠰ ᠵᠡᠷᠭᠡ ᠳᠡᠯᠡᠬᠡᠢᠶᠢᠨ ᠬᠡᠪᠴᠢᠶᠡᠨᠳᠡᠬᠢ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠲᠥᠪᠯᠡᠷᠡᠨ ᠰᠠᠭᠤᠷᠢᠱᠢᠭᠰᠠᠨ ᠭᠠᠵᠠᠷ ᠣᠷᠤᠨᠢ ᠪᠠᠭᠲᠠᠭᠠᠭᠰᠠᠨ ᠪᠠᠢᠨᠠ᠃
ᠭᠤᠷᠪᠠᠳᠤ᠂ ᠤᠷᠠᠨ ᠵᠣᠬᠢᠶᠠᠯᠤᠨ ᠲᠡᠦᠬᠡᠶᠢᠨ ᠤᠬᠠᠮᠰᠠᠷ ᠴᠢᠩᠭᠠ᠃ ᠲᠤᠰ ᠨᠣᠮᠨᠢ ᠰᠲ᠋ᠢᠯᠢ ᠪᠦᠷᠢᠶᠢᠨ ᠠᠳᠠᠯᠢ ᠪᠤᠰᠤ ᠲᠡᠦᠬᠡᠨ ᠱᠠᠲᠤ ᠦᠶᠡᠳᠡᠬᠢ ᠲᠥᠯᠦᠭᠡᠯᠡᠬᠦ ᠴᠢᠨᠠᠷᠲᠠᠢ ᠪᠦᠲᠦᠭᠡᠯᠢ ᠰᠣᠩᠭᠤᠨ ᠣᠷᠤᠭᠤᠯᠬᠤᠶᠢ ᠣᠨᠴᠠᠭᠠᠢᠯᠠᠨ ᠠᠩᠬᠠᠷᠤᠭᠰᠠᠨ ᠪᠠᠢᠨᠠ᠃
ᠳᠥᠷᠪᠡᠳᠤ᠂ ᠰᠣᠩᠭᠤᠨ ᠨᠠᠢᠷᠠᠭᠤᠯᠬᠤ ᠵᠣᠷᠢᠯᠲᠠ᠂ ᠵᠠᠷᠴᠢᠮ᠂ ᠪᠠᠷᠢᠮᠵᠢᠶᠠᠨᠢ ᠪᠤᠲᠠᠲᠠᠢᠲᠠᠢ ᠨᠡᠢᠴᠡᠪᠡ᠃
ᠭᠡᠪᠡᠴᠦ ᠲᠤᠰ ᠴᠤᠪᠤᠷᠠᠯ ᠨᠣᠮᠨᠢ ᠪᠠᠰᠠ ᠵᠠᠷᠢᠮ ᠲᠠᠯᠠᠪᠠᠷ ᠵᠢᠭᠠᠬᠠᠨ ᠬᠠᠷᠠᠮᠰᠠᠯ ᠦᠯᠡᠳᠡᠭᠰᠡᠨ ᠪᠠᠢᠨᠠ᠃
ᠨᠢᠭᠡᠳᠤ᠂ ᠴᠤᠪᠤᠷᠠᠯ ᠨᠣᠮᠤᠨᠨᠡᠷᠡ ᠪᠠ ᠠᠭᠤᠯᠭᠠ ᠪᠦᠷᠢᠮᠦᠰᠦᠨ ᠶᠠᠪ ᠴᠠᠪ ᠲᠣᠬᠢᠷᠠᠭᠰᠠᠨᠦᠭᠡᠢ᠃ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠪᠦᠷᠢᠯᠳᠦᠴᠡ ᠮᠠᠱᠢ ᠪᠤᠳᠤᠯᠢᠶᠠᠨᠲᠠᠢ ᠪᠠᠢᠳᠠᠭ᠂ ᠡᠬᠡ ᠬᠡᠯᠡᠨᠤ ᠤᠷᠠᠨ ᠵᠣᠬᠢᠶᠠᠯᠠᠴᠠ ᠭᠠᠳᠠᠨᠠ ᠪᠠᠰᠠ ᠡᠷᠲᠡ ᠦᠶᠡᠶᠢᠨ ᠬᠢᠲᠠᠳ ᠬᠡᠯᠡ᠂ ᠲᠥᠪᠡᠳ ᠬᠡᠯᠡ ᠪᠠ ᠰᠡᠭᠦᠯᠴᠢᠶᠢᠨ ᠦᠶᠡᠶᠢᠨ ᠣᠷᠤᠰ᠂ ᠶᠠᠫᠤᠨ᠂ ᠠᠩᠭ᠌ᠯᠢ ᠬᠡᠯᠡᠨᠤ ᠪᠦᠲᠦᠭᠡᠯᠢ ᠪᠠᠭᠲᠠᠭᠠᠨᠠ᠃ ᠭᠣᠤᠯ ᠨᠠᠢᠷᠠᠭᠤᠯᠤᠭᠴᠢ ᠡᠮᠦᠨᠡᠬᠢ ᠦᠭᠡᠳᠤᠪᠠᠨ ᠵᠦᠢᠯ ᠵᠦᠢᠯᠦᠨ ᠱᠢᠯᠲᠠᠭᠠᠨᠠᠴᠠ ᠡᠬᠡ ᠬᠡᠯᠡᠨᠤ ᠪᠤᠰᠤ ᠪᠦᠲᠦᠭᠡᠯᠢ ᠣᠷᠤᠭᠤᠯᠤᠭᠰᠠᠨᠦᠭᠡᠢ ᠬᠡᠰᠡᠨ ᠪᠤᠯᠪᠠᠴᠦ ᠲᠤᠰ ᠴᠤᠪᠤᠷᠠᠯ ᠨᠣᠮᠢ ᠬᠠᠷᠢᠨ 《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠭᠡᠵᠤ ᠭᠠᠷᠴᠠᠭᠯᠠᠭᠰᠠᠨ ᠪᠠᠢᠨᠠ᠃ ᠠᠭᠤᠯᠭᠠᠶᠢᠨᠢ ᠦᠨᠳᠦᠰᠦᠯᠡᠪᠡᠯ ᠲᠤᠰ ᠨᠣᠮᠢ 《ᠮᠣᠩᠭᠤᠯ ᠬᠡᠯᠡᠨᠤ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠭᠡᠪᠡᠯ ᠵᠣᠬᠢᠰᠲᠠᠢ ᠱᠢᠭ᠋᠃
ᠬᠤᠶᠠᠷᠲᠤ᠂ ᠠᠭᠤᠯᠭᠠᠶᠢᠨ ᠲᠠᠯᠠᠪᠠᠷ ᠵᠢᠭᠠᠬᠠᠨ ᠬᠠᠷᠠᠮᠰᠠᠯᠲᠠᠢ᠃ ᠵᠢᠱᠢᠶᠡᠯᠡᠪᠡᠯ᠄ ᠥᠭᠦᠯᠡᠯᠭᠡᠶᠢᠨ ᠬᠡᠰᠡᠭᠲᠤ 《ᠮᠣᠩᠭᠤᠯᠤᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠪᠠ 《ᠬᠠᠮᠠᠷ ᠯᠣᠳᠤᠨ》 ᠵᠡᠷᠭᠡ ᠨᠥᠯᠦᠭᠡ ᠶᠡᠬᠡᠲᠡᠢ ᠪᠦᠲᠦᠭᠡᠯᠢ ᠣᠷᠤᠭᠤᠯᠤᠭᠰᠠᠨᠦᠭᠡᠢ᠃
ᠭᠤᠷᠪᠠᠳᠤ᠂ ᠨᠠᠢᠷᠠᠭᠤᠯᠵᠤ ᠪᠠᠷᠯᠠᠭᠰᠠᠨ ᠲᠠᠯᠠᠪᠠᠷ ᠵᠢᠭᠠᠬᠠᠨ ᠬᠠᠷᠠᠮᠰᠠᠯᠲᠠᠢ᠃ ᠨᠠᠢᠷᠠᠭᠤᠯᠤᠯᠢ ᠵᠦᠢᠷ ᠰᠡᠴᠡᠨ ᠦᠭᠡ᠂ ᠣᠨᠢᠰᠤᠭᠠ ᠳᠠᠭᠠᠪᠦᠷᠢ᠂ ᠠᠷᠠᠳᠤᠨ ᠳᠠᠭᠤᠤᠶᠢᠨ ᠦᠭᠡᠶᠢᠨ ᠬᠣᠢᠨᠠ ᠣᠷᠤᠭᠤᠯᠤᠭᠰᠠᠨ ᠪᠠᠢᠨᠠ᠃ ᠭᠡᠪᠡᠴᠤ ᠰᠲ᠋ᠢᠯᠢᠶᠢᠨ ᠲᠣᠮᠤ ᠠᠩᠭᠢᠯᠠᠯᠠᠴᠠ ᠠᠪᠴᠤ ᠬᠡᠯᠡᠪᠡᠯ ᠨᠠᠢᠷᠠᠭᠤᠯᠤᠯᠨᠢ ᠪᠢᠴᠢᠭᠤᠨ ᠤᠷᠠᠨ ᠵᠣᠬᠢᠶᠠᠯᠳᠤ ᠪᠠᠭᠲᠠᠵᠤ ᠪᠠᠢᠨᠠ᠃ ᠡᠢᠮᠦᠡᠴᠡ ᠲᠡᠭᠦᠨᠢ ᠥᠭᠦᠯᠡᠯᠭᠡᠶᠢᠨ ᠬᠣᠢᠨᠠ ᠣᠷᠤᠭᠤᠯᠪᠠᠯ ᠵᠣᠬᠢᠰᠲᠠᠢ ᠱᠢᠭ᠋᠃
ᠰᠡᠴᠡᠨᠪᠠᠲᠤ (ᠳᠤᠮᠳᠠᠳᠤ ᠤᠯᠤᠰᠤᠨ ᠨᠡᠢᠭᠡᠮᠦᠨ ᠱᠢᠨᠵᠢᠯᠡᠬᠦ ᠤᠬᠠᠭᠠᠨᠤ ᠠᠺᠠᠲᠧᠮᠢᠶᠢᠨ ᠦᠨᠳᠦᠰᠦᠲᠡᠨᠤ ᠤᠳᠭᠠ ᠵᠣᠬᠢᠶᠠᠯ ᠰᠤᠳᠤᠯᠬᠤ ᠬᠦᠷᠢᠶᠡᠯᠡᠩᠦᠨ ᠮᠣᠩᠭᠤᠯ ᠤᠳᠭᠠ ᠵᠣᠬᠢᠶᠠᠯ ᠰᠤᠳᠤᠯᠬᠤ ᠰᠠᠯᠪᠦᠷᠢᠶᠢᠨ ᠡᠷᠬᠢᠯᠡᠭᠴᠢ)᠄
《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠨᠢ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠲᠤᠬᠠᠢ ᠦᠵᠡᠯᠲᠡ ᠲᠠᠨᠢᠯᠲᠠ᠂ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠰᠤᠳᠤᠯᠤᠯᠤᠨ ᠠᠳᠠᠯᠢ ᠪᠤᠰᠤ ᠦᠶᠡ ᠱᠠᠲᠤᠶᠢᠨ ᠳᠦᠷᠬᠦ ᠪᠠᠢᠳᠠᠯ᠂ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠰᠤᠳᠤᠯᠤᠯᠤᠨ ᠡᠬᠡ ᠬᠡᠷᠡᠭᠯᠡᠭᠳᠡᠬᠦᠨᠢ ᠠᠭᠤᠳᠠᠯᠤᠨ ᠢᠯᠡᠷᠡᠬᠦᠯᠵᠤ᠂ ᠤᠯᠠᠨᠤ ᠬᠦᠷᠳᠡᠰ ᠪᠣᠯᠭᠠᠨ ᠰᠤᠳᠤᠯᠤᠯᠤᠨ ᠬᠦᠷᠢᠶᠡᠨᠡ ᠣᠷᠤᠭᠤᠯᠵᠤ ᠢᠷᠡᠭᠰᠡᠨ ᠲᠡᠦᠬᠡᠨ ᠬᠥᠭᠵᠢᠯᠲᠡᠶᠢᠨ ᠪᠠᠢᠳᠠᠯᠤᠨ ᠶᠡᠷᠦᠩᠬᠡᠢ ᠲᠥᠯᠦᠪᠢ ᠬᠠᠷᠠᠭᠤᠯᠤᠭᠰᠠᠨᠶᠤᠮ᠃ ᠡᠢᠮᠦ ᠨᠢᠭᠡᠨ ᠬᠥᠭᠵᠢᠯᠦᠨ ᠦᠶᠡ ᠱᠠᠲᠤ ᠳᠣᠲᠤᠷᠠ ᠰᠡᠴᠡᠨᠮᠦ᠋ᠩᠬᠡ ᠫᠷᠤᠹᠧᠰᠰᠤᠷᠤᠨ ᠭᠣᠤᠯᠯᠠᠨ ᠨᠠᠢᠷᠠᠭᠤᠯᠤᠭᠰᠠᠨ 《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠶᠢ ᠲᠠᠯᠪᠢᠵᠤ ᠬᠠᠷᠢᠴᠠᠭᠤᠯᠵᠤ ᠦᠵᠡᠪᠡᠯ ᠲᠡᠭᠦᠨᠤ ᠣᠨᠴᠠᠯᠢᠭ ᠱᠢᠨᠵᠢ ᠠᠴᠢ ᠬᠣᠯᠪᠤᠭᠳᠠᠯ ᠪᠠᠢᠷᠢ ᠰᠠᠭᠤᠷᠢᠨᠢ ᠲᠤᠲᠤᠷᠬᠠᠢ ᠪᠣᠯᠤᠨᠠ᠃ ᠣᠨᠴᠠᠯᠢᠭᠢᠨᠢ ᠭᠣᠤᠯᠳᠠᠭᠤ ᠳᠥᠷᠪᠡᠨ ᠲᠠᠯᠠᠪᠠᠷ ᠬᠤᠷᠢᠶᠠᠩᠭᠤᠢᠯᠠᠵᠤ ᠪᠣᠯᠤᠨᠠ᠃
1. ᠨᠡᠢᠲᠡ ᠮᠣᠩᠭᠤᠯᠤᠨ ᠵᠢᠩᠬᠢᠨᠢ ᠤᠷᠠᠨ ᠵᠣᠬᠢᠶᠠᠯᠤᠨ ᠪᠦᠬᠦᠢᠯᠡ ᠲᠥᠷᠦᠯ ᠵᠦᠢᠯᠢ ᠬᠠᠮᠤᠷᠤᠭᠰᠠᠨ ᠪᠠ ᠲᠥᠷᠦᠯ ᠵᠦᠢᠯᠢᠶᠡᠷᠨᠢ ᠴᠡᠭᠴᠡᠯᠡᠨ ᠦᠵᠡᠭᠦᠯᠦᠭᠰᠡᠨ ᠠᠪᠤᠷᠭᠤ ᠪᠦᠲᠦᠭᠡᠯ ᠪᠣᠯᠵᠠᠢ᠃ 26 ᠲᠣᠮᠤ ᠲᠥᠷᠦᠯ ᠠᠩᠭᠢᠯᠠᠯᠠᠴᠠ 1000 ᠭᠠᠷᠤᠢ ᠵᠣᠬᠢᠶᠠᠯᠢ ᠰᠣᠩᠭᠤᠨ ᠣᠷᠤᠭᠤᠯᠤᠭᠰᠠᠨᠨᠢ ᠵᠠᠭᠤᠨ ᠪᠢᠯᠢᠭᠠᠴᠠ ᠬᠡᠮᠵᠢᠶᠡᠪᠡᠷ ᠨᠡᠩ ᠥᠷᠭᠡᠨ᠂ ᠠᠭᠤᠯᠭᠠ ᠪᠠᠭᠲᠠᠭᠠᠮᠵᠢᠪᠠᠷ ᠨᠡᠩ ᠶᠡᠬᠡ ᠪᠣᠯᠤᠭᠰᠠᠨᠶᠤᠮ᠃
2. 《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠨᠢ ᠳᠤᠮᠳᠠᠳᠤ ᠤᠯᠤᠰᠤᠨ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠪᠠᠢᠳᠠᠯ᠂ ᠢᠯᠠᠩᠭᠤᠶᠠ ᠪᠦᠭᠦᠲᠡ ᠨᠠᠢᠷᠠᠮᠳᠠᠬᠤ ᠳᠤᠮᠳᠠᠳᠤ ᠠᠷᠠᠳ ᠤᠯᠤᠰ ᠪᠠᠢᠭᠤᠯᠤᠭᠳᠠᠭᠰᠠᠨᠠᠴᠠ ᠨᠠᠭᠠᠱᠢᠬᠢ ᠳᠤᠮᠳᠠᠳᠤ ᠤᠯᠤᠰᠤᠨ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠬᠥᠭᠵᠢᠯᠦᠨ ᠳᠦᠷᠢ ᠲᠥᠯᠦᠪᠢ ᠭᠦᠢᠴᠡᠳ ᠬᠠᠷᠠᠭᠤᠯᠤᠭᠰᠠᠨ ᠤᠴᠢᠷᠠᠴᠠ ᠣᠨᠴᠠᠯᠢᠭᠲᠠᠢ ᠪᠣᠯᠵᠤ ᠪᠠᠢᠨᠠ᠃
3. ᠪᠢᠴᠢᠭᠤᠨ ᠤᠷᠠᠨ ᠵᠣᠬᠢᠶᠠᠯ ᠪᠣᠯᠤᠨ ᠠᠮᠠᠨ ᠵᠣᠬᠢᠶᠠᠯᠤᠨ ᠪᠦᠲᠦᠭᠡᠯᠦ᠋ᠳᠢ ᠠᠳᠠᠯᠢ ᠬᠡᠮᠵᠢᠶᠡᠪᠠᠷ ᠣᠷᠤᠭᠤᠯᠤᠭᠰᠠᠨ ᠪᠠᠢᠨᠠ᠃
4. ᠡᠨᠡᠬᠦ ᠪᠦᠲᠦᠭᠡᠯᠨᠢ ᠤᠷᠢᠳᠤᠬᠢ ᠠᠳᠠᠯᠢ ᠪᠤᠰᠤ ᠤᠯᠤᠰ ᠣᠷᠤᠨ᠂ ᠠᠳᠠᠯᠢ ᠪᠤᠰᠤ ᠴᠠᠭ ᠦᠶᠡᠳᠤ ᠬᠡᠪᠯᠡᠭᠳᠡᠨ ᠨᠡᠢᠳᠡᠯᠡᠭᠳᠡᠭᠰᠡᠨ ᠵᠣᠬᠢᠶᠠᠯᠢ ᠲᠡᠭᠦᠪᠦᠷᠢᠯᠡᠨ ᠠᠪᠴᠦ ᠨᠢᠭᠡᠳᠭᠡᠨ ᠬᠡᠪᠯᠡᠭᠰᠡᠨᠢᠶᠡᠷᠢᠶᠡᠨ ᠣᠨᠴᠠᠯᠢᠭᠲᠠᠢᠶᠤᠮ᠃
《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠶᠢᠨ ᠬᠡᠪᠯᠡᠭᠳᠡᠭᠰᠡᠨᠨᠢ ᠮᠠᠱᠢ ᠴᠢᠬᠤᠯᠠ ᠠᠴᠢ ᠬᠣᠯᠪᠤᠭᠳᠠᠯᠲᠠᠢ᠃
1. ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠰᠤᠳᠤᠯᠤᠯᠢ ᠬᠥᠭᠵᠢᠭᠦᠯᠦᠨ ᠠᠬᠢᠭᠤᠯᠬᠤ ᠦᠢᠯᠡᠳᠦᠯ ᠠᠴᠢ ᠬᠣᠯᠪᠤᠭᠳᠠᠯᠲᠠᠢ ᠪᠠᠢᠳᠠᠭ᠃ 《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠨᠢ ᠱᠢᠨᠡ ᠴᠠᠭ ᠦᠶᠡ ᠱᠢᠨᠡ ᠬᠥᠭᠵᠢᠯᠦᠨ ᠲᠦᠪᠱᠢᠨ ᠳᠡᠭᠡᠷᠡ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯ ᠰᠤᠳᠤᠯᠤᠯᠢ ᠤᠯᠠᠨ ᠥᠨᠳᠦᠷ ᠱᠠᠲᠤᠨᠳᠤ ᠲᠦᠯᠬᠢᠨ ᠠᠬᠢᠭᠤᠯᠬᠤ ᠪᠣᠯᠤᠨᠠ᠃
2. ᠲᠤᠰ ᠪᠦᠲᠦᠭᠡᠯᠨᠢ ᠲᠤᠮᠳᠠᠳᠤ ᠤᠯᠤᠰᠲᠤ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠡᠷᠲᠡᠨ ᠡᠳᠦᠭᠡ ᠳᠤᠲᠤᠭᠠᠲᠤ ᠭᠠᠳᠠᠭᠠᠲᠤᠶᠢᠨ ᠬᠥᠭᠵᠢᠯᠦᠨ ᠲᠡᠦᠬᠡᠶᠢ ᠬᠠᠷᠠᠭᠤᠯᠤᠭᠰᠠᠨ 《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠶᠡᠷᠦᠡᠴᠡ ᠭᠠᠷᠤᠭᠠᠦᠭᠡᠢ ᠪᠠᠢᠭᠰᠠᠨ ᠬᠣᠭᠤᠰᠤᠨᠢ ᠨᠥᠬᠦᠪᠦᠷᠢᠯᠡᠵᠦ᠂ ᠢᠯᠠᠩᠭᠤᠶᠠ ᠲᠤᠮᠳᠠᠳᠤ ᠤᠯᠤᠰᠤᠨ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠬᠥᠭᠵᠢᠯᠦᠨ ᠪᠠᠢᠳᠠᠯ ᠲᠦᠷᠢ ᠳᠦᠷᠬᠦᠶᠢ ᠳᠡᠯᠡᠬᠡᠢ ᠳ᠋ᠠᠬᠢᠨᠠ ᠬᠠᠷᠠᠭᠤᠯᠤᠭᠰᠠᠨ ᠬᠦᠨᠳᠦ ᠴᠢᠬᠤᠯᠠ ᠠᠴᠢ ᠬᠣᠯᠪᠤᠭᠳᠠᠯᠲᠠᠢᠶᠤᠮ᠃
3. ᠲᠤᠰ ᠳᠡᠭᠡᠵᠢ ᠪᠢᠴᠢᠭᠨᠢ ᠪᠠᠰᠠ ᠮᠠᠨᠤ ᠨᠠᠮ ᠵᠠᠰᠠᠭᠤᠨ ᠲᠥᠷᠦᠶᠢᠨ ᠪᠣᠳᠤᠯᠭᠠᠶᠢᠨ ᠦᠷᠠ ᠪᠦᠲᠦᠭᠡᠯᠢ ᠰᠤᠷᠲᠠᠯᠴᠢᠯᠠᠬᠤ᠂ ᠳᠤᠮᠳᠠᠳᠤᠶᠢᠨ ᠦᠨᠳᠦᠰᠦᠲᠡᠨᠤ ᠰᠣᠶᠤᠯᠤᠨ ᠬᠠᠮᠲᠤᠶᠢᠨ ᠲᠠᠨᠢᠯᠲᠠᠶᠢ ᠳᠡᠭᠡᠭᠱᠢᠯᠡᠭᠦᠯᠬᠦ᠂ ᠡᠭᠦᠨᠤ ᠤᠯᠠᠮᠠᠴᠠ ᠶᠡᠷᠦᠩᠬᠡᠢ ᠱᠦᠵᠢ ᠰᠢᠵᠢᠨ ᠫᠢᠩᠤᠨ ᠴᠢᠬᠤᠯᠠ ᠶᠠᠷᠢᠶᠠᠨᠤ ᠵᠣᠷᠢᠭ ᠰᠠᠨᠠᠭᠠᠶᠢ ᠪᠤᠳᠠᠳᠤ ᠠᠵᠢᠯᠯᠠᠭᠠᠪᠠᠷ ᠲᠤᠭᠤᠱᠢᠯᠠᠭᠤᠯᠤᠨ ᠬᠡᠷᠡᠭᠵᠢᠭᠦᠯᠦᠭᠰᠡᠨ ᠬᠦᠨᠳᠦ ᠴᠢᠬᠤᠯᠠ ᠤᠯᠤᠰ ᠲᠥᠷᠦᠶᠢᠨ ᠠᠴᠢ ᠬᠣᠯᠪᠤᠭᠳᠠᠯᠲᠠᠢᠶᠤᠮ᠃
4. 《ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯᠤᠨ ᠳᠡᠭᠡᠵᠢ》 ᠠᠷᠠᠳ ᠲᠦᠮᠡᠨᠤ ᠬᠡᠷᠡᠭᠴᠡᠭᠡ ᠱᠠᠭᠠᠷᠳᠠᠯᠭᠠᠶᠢ ᠬᠠᠩᠭᠠᠬᠤ᠂ ᠰᠣᠶᠤᠯᠤᠨ ᠬᠢᠷᠢ ᠲᠦᠪᠱᠢᠨᠢ ᠳᠡᠭᠡᠭᠱᠢᠯᠡᠭᠦᠯᠬᠦᠳᠤ ᠴᠢᠬᠤᠯᠠ ᠠᠴᠢ ᠬᠣᠯᠪᠤᠭᠳᠠᠯᠲᠠᠢᠶᠤᠮ᠃
ᠥᠪᠦᠷ ᠮᠣᠩᠭᠤᠯᠤᠨ ᠡᠳᠦᠷᠦᠨ ᠰᠣᠨᠢᠨᠠᠴᠠ ᠱᠢᠯᠵᠢᠭᠦᠯᠦᠨ ᠨᠡᠢᠳᠡᠯᠡᠪᠡ
ᠰᠤᠷᠪᠤᠯᠵᠢᠯᠠᠭᠴᠢ᠄ ᠪᠤᠷᠮᠠ
