8 ᠰᠠᠷᠠᠶᠢᠨ 19ᠤ ᠡᠳᠦᠷ 《ᠮᠣᠩᠭᠤᠯ ᠮᠣᠷᠢᠨᠤ ᠵᠣᠷᠢᠭ ᠰᠠᠨᠠᠭᠠᠶᠢ ᠪᠠᠳᠠᠷᠠᠭᠤᠯᠬᠤ》 ᠱᠢᠷᠢᠰ ᠨᠣᠮ᠂ ᠭᠣᠤᠯ ᠰᠡᠳᠦᠪᠲᠦ ᠳᠠᠭᠤᠤ ᠭᠦᠭᠵᠢᠮ ᠪᠥᠵᠢᠭᠦᠨ ᠡᠮᠬᠢᠳᠭᠡᠯ ᠵᠢᠴᠢ ᠤᠷᠠᠯᠢᠭᠤᠨ ᠢᠯᠡ ᠵᠠᠬᠢᠳᠠᠯᠤᠨ ᠠᠩᠬᠠ ᠲᠠᠷᠬᠠᠭᠠᠬᠤ ᠶᠣᠰᠤᠯᠠᠯ ᠥᠪᠤᠷ ᠮᠣᠩᠭᠤᠯᠤᠨ ᠱᠢᠩᠬᠤᠸᠠ ᠨᠣᠮᠤᠨ ᠳᠡᠯᠭᠡᠭᠦᠷᠲᠦ ᠶᠠᠪᠤᠭᠳᠠᠪᠠ᠃
ᠮᠣᠩᠭᠤᠯ ᠮᠣᠷᠢᠨᠤ ᠵᠣᠷᠢᠭ ᠰᠠᠨᠠᠭᠠᠶᠢ ᠪᠠᠳᠠᠷᠠᠭᠤᠯᠤᠨ᠂ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠤᠨᠤ ᠠᠳᠤᠭᠤᠨᠤ ᠦᠢᠯᠠᠰᠤᠨ ᠤᠯᠠᠮᠵᠢᠯᠠᠯ ᠬᠢᠭᠡᠳ ᠡᠬᠢ ᠪᠠᠶᠠᠯᠢᠭᠤᠨ ᠳᠠᠪᠠᠭᠤᠯᠢᠭᠢ ᠬᠦᠢᠴᠡᠳ ᠠᠱᠢᠭᠯᠠᠵᠤ᠂ ᠪᠠᠲᠦ ᠪᠡᠬᠢ ᠰᠣᠶᠤᠯᠤᠨ ᠰᠠᠭᠤᠷᠢ ᠬᠢᠭᠡᠳ ᠣᠶᠤᠨ ᠰᠠᠨᠠᠭᠠᠨᠤ ᠲᠤᠯᠭᠠᠭᠤᠷᠢᠯᠠᠯ ᠲᠠᠯᠪᠢᠬᠤᠶᠢᠨ ᠲᠥᠯᠦᠭᠡ᠂ ᠡᠨᠡ ᠵᠢᠯᠦᠨ 4 ᠰᠠᠷᠠᠡᠴᠡ ᠡᠬᠢᠯᠡᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠤᠨᠤ ᠨᠠᠮᠤᠨ ᠬᠣᠷᠢᠶᠠᠨᠤ ᠤᠬᠠᠭᠤᠯᠬᠤ ᠬᠡᠯᠲᠡᠰᠡᠴᠡ ᠥᠪᠤᠷ ᠮᠣᠩᠭᠤᠯᠤᠨ ᠬᠡᠪᠯᠡᠯᠦᠨ ᠪᠦᠯᠦᠭᠯᠡᠯ᠂ ᠥᠪᠤᠷ ᠮᠣᠩᠭᠤᠯᠤᠨ ᠺᠢᠨᠤ᠋ᠶᠢᠨ ᠪᠦᠯᠦᠭᠯᠡᠯ᠂ ᠳᠤᠮᠳᠠᠳᠦ ᠤᠯᠤᠰᠤᠨ ᠱᠢᠤᠳᠠᠨᠤ ᠶᠠᠪᠤᠳᠠᠯᠤᠨ ᠥᠪᠤᠷ ᠮᠣᠩᠭᠤᠯᠤᠨ ᠬᠤᠪᠢᠶᠠᠷᠢ ᠺᠣᠮᠫᠠᠨᠢᠶᠢ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ᠂ 《ᠮᠣᠩᠭᠤᠯ ᠮᠣᠷᠢᠨᠤ ᠵᠣᠷᠢᠭ ᠰᠠᠨᠠᠭᠠᠶᠢ ᠪᠠᠳᠠᠷᠠᠭᠤᠯᠬᠤ》 ᠱᠢᠷᠢᠰ ᠨᠣᠮ᠂ ᠭᠣᠤᠯ ᠰᠡᠳᠦᠪᠲᠦ ᠳᠠᠭᠤᠤ ᠬᠥᠭᠵᠢᠮ ᠪᠥᠵᠢᠭᠦᠨ ᠡᠮᠬᠢᠳᠭᠡᠯ ᠵᠢᠴᠢ ᠤᠷᠠᠯᠢᠭᠤᠨ ᠢᠯᠡ ᠵᠠᠬᠢᠳᠠᠯᠢ ᠬᠡᠪᠯᠡᠨ ᠲᠠᠷᠬᠠᠭᠠᠬᠤ ᠠᠵᠢᠯᠤᠨ ᠲᠤᠬᠠᠢ ᠲᠥᠯᠦᠪᠯᠡᠭᠡ ᠬᠢᠵᠤ᠂ 4 ᠰᠠᠷᠠᠶᠢᠨ ᠬᠤᠭᠤᠴᠠᠭᠠᠪᠠᠷ ᠳᠠᠮᠵᠢᠨ ᠲᠤᠰ ᠱᠢᠷᠢᠰ ᠪᠦᠳᠦᠭᠡᠯᠨᠢ ᠦᠵᠡᠭᠴᠢᠳᠲᠠᠢ ᠵᠣᠯᠭᠠᠭᠰᠠᠨ ᠪᠠᠢᠨᠠ᠃
《ᠮᠣᠩᠭᠤᠯ ᠮᠣᠷᠢᠨᠤ ᠵᠣᠷᠢᠭ ᠰᠠᠨᠠᠭᠠᠶᠢ ᠪᠠᠳᠠᠷᠠᠭᠤᠯᠬᠤ》 ᠱᠢᠷᠢᠰ ᠪᠦᠲᠦᠭᠡᠯᠳᠤ ᠥᠪᠤᠷ ᠮᠣᠩᠭᠤᠯᠤᠨ ᠠᠷᠠᠳᠤᠨ ᠬᠡᠪᠯᠡᠯᠦᠨ ᠬᠣᠷᠢᠶᠠ᠂ ᠥᠪᠤᠷ ᠮᠣᠩᠭᠤᠯᠤᠨ ᠰᠤᠷᠭᠠᠨ ᠬᠥᠮᠦᠵᠢᠯᠦᠨ ᠬᠡᠪᠯᠡᠯᠦᠨ ᠬᠣᠷᠢᠶᠠ᠂ ᠥᠪᠤᠷ ᠮᠣᠩᠭᠤᠯᠤᠨ ᠠᠯᠤᠰᠤᠨᠪᠠᠷᠠ ᠬᠡᠪᠯᠡᠯᠦᠨ ᠬᠣᠷᠢᠶᠠᠡᠴᠡ ᠬᠡᠪᠯᠡᠭᠦᠯᠦᠭᠰᠡᠨ 《ᠠᠳᠤᠭᠤᠨ ᠰᠣᠶᠤᠯ ᠬᠢᠭᠡᠳ ᠠᠳᠤᠭᠤᠨᠤ ᠠᠵᠤ ᠦᠢᠯᠠᠰᠤᠨ ᠰᠤᠳᠤᠯᠭᠠᠨᠤ ᠴᠤᠪᠤᠷᠠᠯ ᠪᠢᠴᠢᠭ》 (6 ᠲᠡᠪᠳᠡᠷ) ᠂ 《ᠠᠳᠤᠭᠤᠨ ᠰᠣᠶᠤᠯ ᠬᠢᠭᠡᠳ ᠠᠳᠤᠭᠤᠨᠤ ᠠᠵᠤ ᠦᠢᠯᠠᠰᠤᠨ ᠰᠤᠳᠤᠯᠭᠠᠨᠤ ᠴᠤᠪᠤᠷᠠᠯ ᠪᠢᠴᠢᠭ》 ( ᠵᠢᠵᠢᠭ ᠲᠡᠪᠳᠡᠷ᠂ 6 ᠳᠡᠪᠲᠡᠷ) ᠂ 《ᠳᠤᠮᠳᠠᠳᠦᠶᠢᠨ ᠠᠳᠤᠭᠤᠨ ᠰᠣᠶᠤᠯᠤᠨ ᠱᠢᠷᠢᠰ ᠴᠤᠪᠤᠷᠠᠯ ᠪᠢᠴᠢᠭ》 (6 ᠳᠡᠪᠲᠡᠷ) ᠂ 《ᠳᠤᠮᠳᠠᠳᠦ ᠤᠯᠤᠰᠤᠨ ᠠᠳᠤᠭᠤᠨ ᠰᠣᠶᠤᠯᠤᠨ ᠬᠥᠬᠡ ᠭᠠᠳᠠᠷᠲᠦ ᠪᠢᠴᠢᠭ》 ᠂ 《ᠮᠣᠩᠭᠤᠯ ᠠᠳᠤᠭᠤ ᠬᠢᠭᠡᠳ ᠲᠠᠯᠠ ᠨᠤᠳᠤᠭᠤᠨ ᠰᠣᠶᠤᠯ》 ᠂ 《ᠥᠪᠤᠷ ᠮᠣᠩᠭᠤᠯᠤᠨ ᠱᠢᠯᠢᠳᠡᠭ ᠦᠯᠢᠭᠡᠷ》 ᠂ 《ᠮᠣᠷᠢᠨ ᠨᠢᠷᠤᠭᠤᠨ ᠳᠡᠭᠡᠷᠡᠬᠢ ᠦᠨᠳᠦᠰᠦᠳᠡᠨ》 ᠂ 《ᠰᠠᠬᠢᠭᠤᠯᠰᠤᠨ ᠬᠦᠯᠦᠭ》 ᠵᠡᠷᠭᠡ 27 ᠲᠥᠷᠦᠯᠦᠨ ᠨᠣᠮ ᠪᠢᠴᠢᠭ ᠬᠢᠭᠡᠳ ᠮᠣᠷᠢᠪᠠᠷ ᠰᠠᠳᠤᠪᠯᠡᠭᠰᠡᠨ ᠤᠷᠠᠯᠢᠭᠤᠨ ᠢᠯᠡ ᠵᠠᠬᠢᠳᠠᠯ᠂ 《ᠲᠦᠮᠡᠨ ᠠᠭᠳᠠᠶᠢᠨ ᠲᠦᠪᠡᠷᠭᠡᠨ —— ᠮᠣᠩᠭᠤᠯ ᠮᠣᠷᠢᠨᠤ ᠭᠣᠤᠯ ᠰᠡᠳᠦᠪᠲᠦ ᠳᠠᠭᠤᠤ᠂ ᠬᠥᠭᠵᠢᠮ᠂ ᠪᠥᠵᠢᠭᠦᠨ ᠴᠣᠮᠤᠭ》 ᠵᠡᠷᠭᠡᠶᠢ ᠪᠠᠭᠳᠠᠭᠠᠭᠰᠠᠨ ᠪᠠᠢᠨᠠ᠃
ᠡᠳᠡᠭᠡᠷ ᠨᠣᠮ ᠪᠢᠴᠢᠭᠨᠢ ᠤᠯᠤᠰᠤᠨ ᠳᠤᠳᠤᠭᠠᠳᠤᠬᠢ ᠠᠩᠬᠠᠳᠠᠭᠴᠢ ᠠᠳᠤᠭᠤᠨᠤ ᠰᠤᠳᠤᠯᠤᠯ᠂ ᠠᠳᠤᠭᠤᠨᠤ ᠠᠵᠤ ᠦᠢᠯᠠᠰ ᠬᠢᠭᠡᠳ ᠮᠣᠩᠭᠤᠯ ᠮᠣᠷᠢᠨᠤ ᠵᠣᠷᠢᠭ ᠰᠠᠨᠠᠭᠠᠶᠢ ᠱᠢᠰᠲᠧᠮᠲᠠᠢ ᠰᠤᠳᠤᠯᠤᠨ ᠲᠠᠢᠯᠪᠤᠷᠢᠯᠠᠭᠰᠠᠨ ᠴᠤᠪᠤᠷᠠᠯ ᠪᠢᠴᠢᠭ ᠪᠠᠢᠵᠤ᠂ ᠠᠳᠤᠭᠤᠨᠤ ᠰᠤᠳᠤᠯᠤᠯᠤᠨ ᠬᠦᠷᠢᠶᠡᠨᠳᠡᠬᠢ ᠬᠣᠭᠤᠰᠤᠨᠢ ᠨᠦᠬᠦᠪᠦᠷᠢᠯᠠᠪᠠ᠃ 《ᠠᠳᠤᠭᠤᠨ ᠰᠣᠶᠤᠯ》 ᠱᠢᠷᠢᠰ ᠨᠣᠮ ᠪᠢᠴᠢᠭᠤᠨ ᠬᠡᠪᠯᠡᠭᠳᠡᠭᠰᠡᠨᠨᠢ ᠮᠠᠨᠤ ᠣᠷᠤᠨᠤ 《ᠮᠣᠩᠭᠤᠯ ᠮᠣᠷᠢᠨᠤ ᠵᠣᠷᠢᠭ ᠰᠠᠨᠠᠭᠠ》 ᠶᠢ ᠱᠢᠨᠵᠢᠯᠡᠨ ᠰᠤᠳᠤᠯᠤᠭᠰᠠᠨ ᠪᠤᠳᠠᠳᠠᠢ ᠦᠷᠠ ᠪᠦᠳᠦᠭᠡᠯ ᠪᠠᠢᠵᠤ᠂ 《ᠮᠣᠩᠭᠤᠯ ᠮᠣᠷᠢᠨᠤ ᠵᠣᠷᠢᠭ ᠰᠠᠨᠠᠭᠠ》 ᠶᠢ ᠪᠠᠳᠠᠷᠠᠭᠤᠯᠤᠨ ᠬᠥᠭᠵᠢᠭᠦᠯᠬᠦᠳᠦ ᠣᠨᠤᠯᠤᠨ ᠪᠠ ᠪᠤᠳᠠᠳᠦ ᠪᠠᠷᠢᠮᠳᠠ ᠬᠠᠩᠭᠠᠭᠰᠠᠨ ᠪᠠᠢᠨᠠ᠃
ᠥᠪᠤᠷ ᠮᠣᠩᠭᠤᠯᠤᠨ ᠡᠳᠦᠷᠦᠨ ᠰᠣᠨᠢᠨᠡᠴᠡ ᠱᠢᠯᠵᠢᠭᠦᠯᠦᠨ ᠨᠡᠢᠲᠡᠯᠡᠪᠡ
ᠰᠤᠷᠪᠤᠯᠵᠢᠯᠠᠭᠴᠢ ᠨᠠᠢᠷᠠᠭᠤᠯᠤᠭᠴᠢ᠄ ᠪᠤᠤ ᠰᠠᠷᠠᠭᠤᠯ (ᠥᠪᠤᠷ ᠮᠣᠩᠭᠤᠯᠤᠨ ᠡᠳᠦᠷᠦᠨ ᠰᠣᠨᠢᠨ)
