9 ᠰᠠᠷᠠᠶᠢᠨ 22ᠤᠨ ᠡᠳᠦᠷ᠂ ᠦᠪᠦᠷ ᠮᠤᠩᠭᠤᠯᠤᠨ ᠪᠠᠭᠠᠴᠤᠳ ᠬᠡᠤᠬᠡᠳᠤᠨ ᠬᠡᠪᠯᠡᠯ ᠬᠤᠷᠢᠶᠠ ᠪᠤᠯᠤᠨ ᠱᠢᠨᠬᠤᠧᠠ ᠮᠤᠩᠭᠤᠯ ᠨᠧᠲᠡᠴᠡ ᠬᠠᠮᠳᠤᠷᠠᠨ ᠵᠤᠬᠢᠶᠠᠨ ᠪᠠᠢᠭᠤᠯᠤᠭᠰᠠᠨ 《ᠪᠦᠷᠢᠨᠪᠠᠶᠠᠷᠤᠨ ᠵᠤᠬᠢᠶᠠᠯ ᠪᠦᠳᠦᠬᠡᠯᠤᠨ ᠬᠤᠷᠢᠶᠠᠩᠭᠤᠢ》 ᠬᠡᠮᠡᠬᠦ ᠠᠷᠪᠠᠨ ᠪᠤᠳᠢ ᠨᠤᠮᠤᠨ ᠶᠠᠷᠢᠯᠴᠠᠯᠭᠠ ᠵᠢᠴᠢ ᠭᠠᠷᠤᠨ ᠦᠰᠦᠭ ᠵᠢᠷᠤᠵᠤ ᠳᠠᠷᠬᠠᠭᠠᠬᠤ ᠶᠤᠰᠤᠯᠠᠯ ᠦᠪᠦᠷ ᠮᠤᠩᠭᠤᠯᠤᠨ ᠤᠯᠠᠨ ᠤᠯᠤᠰᠤᠨ ᠦᠵᠡᠰᠬᠦᠯᠡᠩᠤᠨ ᠳᠦᠪᠲᠤ ᠪᠤᠯᠪᠠ᠃
ᠶᠤᠰᠤᠯᠠᠯᠤᠨ ᠦᠶᠡᠪᠡᠷ᠂ ᠨᠡᠷᠡᠳᠦ ᠮᠡᠳᠡᠬᠡᠯᠡᠯᠤᠨ ᠤᠷᠠᠨ ᠵᠤᠬᠢᠶᠠᠯᠴᠢ ᠪᠦᠷᠢᠨᠪᠠᠶᠠᠷᠡᠴᠡ ᠡᠨᠡᠬᠦ ᠨᠤᠮᠤᠨᠢᠶᠡᠨ ᠦᠨᠳᠦᠰᠦᠨ ᠪᠠᠢᠳᠠᠯ ᠪᠤᠯᠤᠨ ᠵᠤᠬᠢᠶᠠᠨ ᠪᠦᠳᠦᠬᠡᠯᠬᠡᠶᠢᠨ ᠵᠠᠮ ᠮᠦᠷ᠂ ᠦᠯᠢᠬᠡᠷ ᠤᠴᠠᠷᠠᠯ᠂ ᠤᠯᠤᠯᠳᠠ ᠠᠮᠵᠢᠯᠳᠠᠪᠡᠨ ᠤᠩᠱᠢᠭᠴᠢᠳᠲᠠᠢ ᠬᠤᠪᠢᠶᠠᠯᠴᠠᠪᠠ᠃ ᠦᠪᠦᠷ ᠮᠤᠩᠭ᠋ᠤᠯᠤᠨ ᠤᠳᠬᠠ ᠤᠷᠠᠯᠢᠭᠤᠨ ᠬᠢᠨᠤ ᠬᠤᠯᠪᠤᠭᠠᠶᠢᠨ ᠳᠡᠳ᠋ ᠳᠡᠷᠢᠬᠦᠯᠡᠭᠴᠢ᠂ ᠦᠪᠦᠷ ᠮᠤᠩᠭᠤᠯᠤᠨ ᠵᠤᠬᠢᠶᠠᠯᠴᠢᠳᠤᠨ ᠨᠡᠢᠬᠡᠮᠯᠢᠭᠤᠨ ᠳᠡᠷᠢᠬᠦᠯᠡᠭᠴᠢ᠂ ᠦᠪᠦᠷ ᠮᠤᠩᠭᠤᠯᠤᠨ ᠪᠠᠭᠱᠢᠶᠢᠨ ᠶᠡᠬᠡ ᠰᠤᠷᠭᠠᠭᠤᠯᠢᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯᠤᠨ ᠳᠡᠬᠡᠳᠦ ᠰᠤᠷᠭᠠᠭᠤᠯᠢᠶᠢᠨ ᠵᠠᠬᠢᠷᠤᠯ ᠳᠤᠷᠤᠨᠠᠲ᠋ᠡᠭᠷᠢᠡᠴᠡ ᠪᠦᠷᠢᠨᠪᠠᠶᠠᠷᠤᠨ ᠵᠤᠬᠢᠶᠠᠯ ᠪᠦᠳᠦᠬᠡᠯᠤᠨ ᠠᠴᠢ ᠬᠤᠯᠪᠤᠭᠳᠠᠯ᠂ ᠮᠤᠩᠭᠤᠯ ᠤᠷᠠᠨ ᠵᠤᠬᠢᠶᠠᠯᠤᠨ ᠳᠡᠤᠬᠡᠨᠳᠤ ᠦᠵᠡᠬᠦᠯᠦᠭᠰᠡᠨ ᠭᠠᠪᠢᠶᠠ ᠵᠢᠳᠬᠦᠯᠤᠨ ᠳᠠᠯᠠᠪᠡᠷ ᠦᠨᠡᠯᠡᠵᠤ᠂ ᠦᠪᠦᠷ ᠮᠤᠩᠭᠤᠯᠤᠨ ᠶᠡᠬᠡ ᠰᠤᠷᠭᠠᠭᠤᠯᠢᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯᠤᠨ ᠳᠡᠬᠡᠳᠦ ᠰᠤᠷᠭᠠᠭᠤᠯᠢᠶᠢᠨ ᠳᠡᠳ ᠵᠠᠬᠢᠷᠤᠯ ᠡᠷᠳᠡᠨᠢᠬᠠᠳᠠᠡᠴᠡ ᠨᠤᠮᠳᠤ ᠰᠤᠩᠭᠤᠭᠳᠠᠭᠰᠠᠨ ᠴᠢᠬᠤᠯᠠ ᠪᠦᠳᠦᠬᠡᠯᠤᠳᠤᠨ ᠨᠦᠯᠦᠬᠡ ᠳᠤᠰᠭᠠᠯ᠂ ᠮᠦᠨ ᠪᠦᠷᠢᠨᠪᠠᠶᠠᠷ ᠭᠤᠧᠠᠢᠶᠢᠨ ᠮᠤᠩᠭᠤᠯ ᠦᠨᠳᠦᠰᠦᠳᠡᠨᠤ ᠮᠡᠳᠡᠬᠡᠯᠡᠯᠤᠨ ᠤᠷᠠᠨ ᠵᠤᠬᠢᠶᠠᠯᠤᠨ ᠨᠢᠬᠡᠨ ᠦᠶᠡᠶᠢᠨ ᠭᠠᠢᠬᠠᠮᠱᠢᠭᠢ ᠡᠬᠦᠳᠦᠭᠰᠡᠨ ᠵᠢᠴᠢ ᠵᠠᠯᠠᠭᠤ ᠨᠢᠬᠡ ᠦᠶᠡᠶᠢᠨ ᠮᠡᠳᠡᠬᠡᠯᠡᠯᠤᠨ ᠤᠷᠠᠨ ᠵᠤᠬᠢᠶᠠᠯᠴᠢᠳᠤᠨ ᠡᠩᠨᠡᠬᠡᠶᠢ ᠪᠠᠢᠭᠤᠯᠤᠭᠰᠠᠨ ᠳᠤᠬᠠᠢ ᠨᠠᠷᠢᠨ ᠳᠠᠨᠢᠯᠴᠠᠭᠤᠯᠵᠠᠢ᠃
《ᠪᠦᠷᠢᠨᠪᠠᠶᠠᠷᠤᠨ ᠵᠤᠬᠢᠶᠠᠯ ᠪᠦᠳᠦᠬᠡᠯᠤᠨ ᠬᠤᠷᠢᠶᠠᠩᠭᠤᠢ》 ᠨᠤᠮᠨᠢ 《ᠨᠢᠩᠵᠢᠨ ᠰᠡᠳᠬᠢᠯ》 ᠂ 《ᠦᠢᠯᠡᠰᠤᠨ ᠳᠤᠤᠯᠢ》 ᠂ 《ᠦᠵᠦᠬᠦᠷ ᠰᠡᠳᠬᠢᠯᠤᠨ ᠳᠡᠮᠡᠤᠯᠡᠯ》 ᠂ 《ᠬᠤᠷᠴᠢᠨᠤ ᠠᠯᠳᠠᠷᠳᠤ ᠬᠦᠮᠦᠰ》 ᠂ 《ᠨᠠᠷᠠ ᠡᠷᠬᠦᠭᠰᠡᠨ ᠨᠤᠳᠤᠭ》 ᠂ 《ᠴᠢᠨᠳᠠᠮᠤᠨᠢ ᠬᠡᠯᠬᠢᠶᠡ》 (ᠳᠡᠬᠡᠳᠦ᠂ ᠳᠤᠤᠷᠠᠳᠤ)᠂ 《ᠪᠢᠯᠢᠭ ᠬᠤᠷᠠᠬᠤᠢ》 ᠂ 《ᠮᠤᠤᠠᠤᠰᠤᠶᠢᠨ ᠨᠤᠮᠢᠨ ᠨᠤᠭᠤᠭᠠᠨ ᠳᠤᠤᠯᠢᠰ》 ᠂ 《ᠡᠷᠳᠡᠨᠢᠶᠢᠨ ᠤᠯᠠ ᠮᠦᠷ》 ᠵᠡᠷᠬᠡ ᠠᠷᠪᠠᠨ ᠪᠤᠳᠢᠪᠡᠷ ᠪᠦᠷᠢᠯᠳᠦᠵᠤ᠂ ᠠᠯᠳᠠᠷᠳᠤ ᠵᠤᠬᠢᠶᠠᠯᠴᠢ ᠪᠦᠷᠢᠨᠪᠠᠶᠠᠷᠤᠨ ᠶᠡᠷᠦᠶᠢᠨ ᠬᠦᠮᠦᠨᠤ ᠶᠡᠷᠦ ᠪᠤᠰᠤᠶᠢᠨ ᠦᠢᠯᠡ ᠶᠠᠪᠤᠳᠠᠯᠢ ᠬᠦᠤᠷᠨᠢᠨ ᠳᠡᠮᠳᠡᠭᠯᠡᠭᠰᠡᠨ᠂ ᠨᠠᠷᠢᠨ ᠦᠢᠯᠡᠰ ᠨᠢᠳᠦᠨᠳᠤ ᠦᠵᠡᠭᠳᠡᠵᠤ ᠭᠠᠷᠲᠤ ᠪᠠᠷᠢᠭᠳᠠᠮᠠ᠂ ᠵᠠᠩ ᠠᠭᠠᠯᠢᠶᠢ ᠦᠩᠬᠡ ᠭᠠᠯᠪᠢᠷᠲᠠᠢ ᠳᠤᠳᠤᠷᠠᠭᠤᠯᠤᠨ ᠦᠯᠢᠬᠡᠷ ᠤᠴᠢᠷᠢ ᠰᠡᠳᠬᠢᠯᠳᠤ ᠬᠠᠳᠠᠩᠱᠢᠭᠤᠯᠤᠮᠠ ᠳᠤᠭᠤᠷᠪᠢᠭᠰᠠᠨ ᠤᠯᠠᠨ ᠰᠠᠢᠬᠠᠨ ᠪᠦᠳᠦᠬᠡᠯᠤᠳᠢ ᠬᠠᠮᠤᠷᠴᠠᠢ᠃
ᠨᠡᠷᠡᠳᠦ ᠵᠤᠬᠢᠶᠠᠯᠴᠢ ᠪᠦᠷᠢᠨᠪᠠᠶᠠᠷ ᠭᠤᠧᠠᠢ ᠪᠤᠯ ᠦᠪᠦᠷ ᠮᠤᠩᠭᠤᠯᠤᠨ ᠵᠠᠷᠤᠳ ᠬᠤᠱᠢᠭᠤᠨᠤ ᠤᠤᠭᠠᠯ᠂ ᠤᠯᠤᠰᠤᠨ ᠨᠢᠬᠡᠳᠦᠬᠡᠷ ᠳᠡᠰᠤᠨ ᠵᠤᠬᠢᠶᠠᠯᠴᠢ᠂ ᠪᠦᠬᠦ ᠤᠯᠤᠰᠤᠨ ᠴᠦᠬᠡᠨ ᠳᠤᠭᠠᠳᠤ ᠦᠨᠳᠦᠰᠦᠳᠡᠨᠤ ᠤᠳᠬᠠ ᠵᠤᠬᠢᠶᠠᠯᠤᠨ 《ᠠᠵᠢᠨᠠᠢ ᠬᠦᠯᠦᠭ》 ᠱᠠᠩᠨᠠᠯ ᠱᠢᠯᠭᠠᠷᠠᠭᠤᠯᠬᠤ ᠺᠤᠮᠢᠰᠤᠨ ᠬᠡᠱᠢᠬᠦᠨ᠂ ᠪᠦᠬᠦ ᠤᠯᠤᠰᠤᠨ 《ᠯᠦ᠍ ᠱᠢᠶᠦ᠋ᠨ》 ᠤᠳᠬᠠ ᠵᠤᠬᠢᠶᠠᠯᠤᠨ ᠱᠠᠩᠨᠠᠯ ᠱᠢᠯᠭᠠᠷᠠᠭᠤᠯᠬᠤ ᠺᠤᠮᠢᠰᠤᠨ ᠬᠡᠱᠢᠬᠦᠨ᠂ ᠪᠦᠬᠦ ᠤᠯᠤᠰᠤᠨ 《ᠳᠤᠷᠤᠨᠠ》 ᠤᠳᠬᠠ ᠵᠤᠬᠢᠶᠠᠯᠤᠨ ᠱᠠᠩᠨᠠᠯ ᠱᠢᠯᠭᠠᠷᠠᠭᠤᠯᠬᠤ ᠺᠤᠮᠢᠰᠤᠨ ᠬᠡᠱᠢᠬᠦᠨ ᠪᠦᠬᠡᠳ ᠠᠯᠪᠠᠨ ᠬᠡᠷᠤᠨ ᠳᠡᠳ᠋ ᠡᠷᠬᠢᠯᠡᠭᠴᠢ᠂ ᠦᠪᠦᠷ ᠮᠤᠩᠭᠤᠯᠤᠨ ᠦᠪᠡᠷᠳᠡᠬᠡᠨ ᠵᠠᠰᠠᠬᠤ ᠤᠷᠤᠨᠤ 《ᠰᠤᠯᠤᠩᠭᠠ》 ᠤᠳᠬᠠ ᠵᠤᠬᠢᠶᠠᠯᠤᠨ ᠱᠠᠩᠨᠠᠯ ᠱᠢᠯᠭᠠᠷᠠᠭᠤᠯᠬᠤ ᠺᠤᠮᠢᠰᠤᠨ ᠬᠡᠱᠢᠬᠦᠨ᠃ ᠳᠡᠷᠡᠪᠡᠷ ᠦᠪᠦᠷ ᠮᠤᠩᠭᠤᠯᠤᠨ ᠵᠤᠬᠢᠶᠠᠯᠴᠢᠳᠤᠨ ᠨᠡᠢᠬᠡᠮᠯᠢᠭᠤᠨ ᠪᠠᠢᠩᠭᠤᠶᠢᠨ ᠳᠡᠳ᠋ ᠳᠡᠷᠢᠬᠦᠯᠡᠭᠴᠢ᠂ 《ᠵᠢᠷᠢᠮᠤᠨ ᠤᠷᠠᠨ ᠵᠤᠬᠢᠶᠠᠯ》 ᠰᠡᠳᠬᠦᠯᠤᠨ ᠶᠡᠷᠦᠩᠬᠡᠢ ᠨᠠᠢᠷᠠᠭᠤᠯᠤᠭᠴᠢ᠂ ᠳᠤᠮᠳᠠᠳᠤ ᠤᠯᠤᠰᠤᠨ ᠮᠡᠳᠡᠬᠡᠯᠡᠯᠤᠨ ᠤᠷᠠᠨ ᠵᠤᠬᠢᠶᠠᠯᠤᠨ ᠨᠡᠢᠬᠡᠮᠯᠢᠭᠤᠨ ᠬᠡᠷᠡᠭ ᠡᠷᠬᠢᠯᠡᠭᠴᠢ ᠵᠡᠷᠬᠡ ᠤᠯᠠᠨ ᠡᠬᠦᠷᠬᠡ ᠳᠤᠱᠢᠶᠠᠯ ᠬᠠᠷᠢᠭᠤᠴᠠᠵᠤ ᠶᠠᠪᠤᠵᠠᠢ᠃ 1972ᠣᠨᠳᠤ ᠤᠤᠭᠠᠨ ᠪᠦᠳᠦᠬᠡᠯ 《ᠳᠡᠤᠬᠡᠶᠢ ᠡᠬᠦᠳᠦᠨ ᠪᠦᠳᠦᠬᠡᠭᠴᠢ ᠬᠦᠳᠡᠯᠮᠦᠷᠢᠴᠢᠳ》 ᠢᠶᠡᠨ 《ᠵᠢᠷᠢᠮᠤᠨ ᠰᠤᠨᠢᠨ》 ᠳᠤ ᠨᠡᠢᠳᠡᠯᠡᠬᠦᠯᠦᠭᠰᠡᠨᠡᠴᠡ ᠨᠠᠭᠠᠱᠢ ᠳᠤᠭᠠ ᠳᠤᠮᠱᠢ ᠦᠬᠡᠢ ᠤᠯᠠᠨ ᠪᠦᠳᠦᠬᠡᠯ ᠳᠤᠭᠤᠷᠪᠢᠨ ᠤᠯᠤᠰᠤᠨ ᠳᠤᠳᠤᠭᠠᠳᠤᠭᠠᠳᠠᠭᠠᠳᠤᠶᠢᠨ ᠰᠤᠨᠢᠨ ᠰᠡᠳᠬᠦᠯᠤᠳᠢᠶᠡᠷ ᠨᠡᠢᠳᠡᠯᠡᠬᠦᠯᠵᠤ᠂ ᠪᠦᠬᠦ ᠤᠯᠤᠰᠤᠨ ᠴᠦᠬᠡᠨ ᠳᠤᠭᠠᠳᠤ ᠦᠨᠳᠦᠰᠦᠳᠡᠨᠤ ᠤᠳᠬᠠ ᠵᠤᠬᠢᠶᠠᠯᠤᠨ 《ᠠᠵᠢᠨᠠᠢ ᠬᠦᠯᠦᠭ》 ᠱᠠᠩᠨᠠᠯ᠂ ᠪᠦᠬᠦ ᠤᠯᠤᠰᠤᠨ 《ᠳᠠᠪᠤ ᠨᠢᠬᠡᠶᠢᠨ ᠢᠨᠵᠧᠨᠧᠷᠢᠩ》 ᠤᠨ ᠱᠠᠩᠨᠠᠯ᠂ ᠦᠪᠦᠷ ᠮᠤᠩᠭᠤᠯᠤᠨ ᠦᠪᠡᠷᠳᠡᠬᠡᠨ ᠵᠠᠰᠠᠬᠤ ᠤᠷᠤᠨᠤ 《ᠰᠤᠯᠤᠩᠭᠠ》 ᠱᠠᠩᠨᠠᠯ ᠵᠡᠷᠬᠡᠪᠡᠷ ᠤᠯᠠᠨᠳᠠ ᠮᠢᠯᠢᠶᠠᠯᠭᠠᠵᠤ ᠶᠠᠪᠤᠵᠠᠢ᠃
ᠱᠢᠨᠬᠤᠧᠠ ᠮᠤᠩᠭᠤᠯ ᠨᠧᠲᠡᠴᠡ ᠱᠢᠯᠵᠢᠭᠦᠯᠦᠨ ᠨᠡᠢᠲᠡᠯᠡᠪᠡ
