ᠥᠪᠦᠷ ᠮᠣᠩᠭᠤᠯᠤᠨ ᠬᠡᠪᠯᠡᠯᠦᠨ ᠪᠦᠯᠦᠭᠯᠡᠯ ᠠᠵᠢᠯᠳᠠᠳᠤᠨᠢᠶᠡᠨ ᠠᠵᠢᠯᠤᠨ ᠴᠢᠯᠦᠭᠡᠨᠦ ᠰᠣᠶᠤᠯᠤᠨ ᠠᠮᠢᠳᠤᠷᠠᠯᠢ ᠤᠯᠠᠮ ᠪᠠᠶᠠᠯᠢᠭᠵᠢᠭᠤᠯᠵᠦ᠂ ᠥᠭᠡᠳᠡᠷᠬᠡᠭ ᠢᠳᠡᠪᠬᠢᠳᠡᠢ ᠰᠣᠶᠤᠯᠤᠨ ᠠᠭᠤᠷ ᠠᠮᠢᠰᠭᠤᠯᠢ ᠪᠤᠢ ᠪᠣᠯᠭᠠᠨ᠂ ᠬᠠᠷᠢᠯᠴᠠᠭᠠ ᠬᠣᠯᠪᠤᠭᠠ ᠪᠦᠯᠬᠦᠮᠳᠡᠯ ᠨᠢᠭᠳᠠᠷᠠᠯᠢ ᠤᠯᠠᠮ ᠴᠢᠩᠭᠠᠳᠭᠠᠬᠤ ᠭᠡᠰᠡᠨ ᠵᠣᠷᠢᠯᠭᠠᠪᠡᠷ 2020 ᠣᠨᠤ 10 ᠰᠠᠷᠠᠶᠢᠨ 12——16ᠤ ᠡᠳᠦᠷ ᠬᠣᠶᠠᠳᠠᠭᠴᠢ ᠤᠳᠠᠭᠠᠨᠤ ᠠᠵᠢᠯᠳᠠᠨ ᠠᠵᠢᠯᠲᠠᠳᠤᠨ ᠲᠠᠮᠢᠷᠤᠨ ᠤᠷᠤᠯᠳᠤᠭᠠᠨᠢ ᠡᠷᠬᠢᠯᠡᠨ ᠶᠠᠪᠤᠭᠳᠠᠭᠤᠯᠪᠠ᠃
ᠲᠤᠰ ᠤᠳᠠᠭᠠᠨᠤ ᠤᠷᠤᠯᠳᠤᠭᠠᠨᠨᠢ 《ᠪᠡᠶᠡ ᠮᠠᠬᠠᠪᠤᠳᠢᠶᠠᠨ ᠴᠢᠭᠢᠷᠠᠭᠵᠢᠭᠤᠯᠤᠨ ᠵᠤᠯᠪᠤᠭᠠᠳᠤ ᠦᠢᠯᠡᠰᠢᠶᠡᠨ ᠴᠤᠭᠴᠠᠯᠠᠵᠦ᠂ ᠪᠦᠯᠬᠦᠮᠳᠡᠯ ᠨᠢᠭᠳᠠᠷᠠᠯᠢ ᠴᠢᠩᠭᠠᠳᠭᠠᠨ ᠬᠠᠮᠳᠤᠪᠡᠷ ᠳᠡᠮᠡᠴᠡᠨ ᠤᠷᠤᠭᠱᠢᠯᠠᠰᠤᠭᠠᠢ —— ᠥᠪᠦᠷ ᠮᠣᠩᠭᠤᠯᠤᠨ ᠰᠤᠷᠭᠠᠨ ᠬᠥᠮᠦᠵᠢᠯᠦᠨ ᠬᠡᠪᠯᠡᠯᠤᠨ ᠬᠣᠷᠢᠶᠠ ᠪᠠᠢᠭᠤᠯᠤᠭᠳᠠᠭᠰᠠᠨ 60 ᠵᠢᠯᠤᠨ ᠤᠢᠶᠢ ᠳᠤᠷᠠᠰᠭᠠᠨ ᠲᠡᠮᠳᠡᠭᠯᠡᠶᠡ》 ᠬᠡᠮᠡᠬᠦ ᠭᠣᠤᠯ ᠰᠡᠳᠦᠪᠦᠨ ᠳᠤᠭᠤᠷᠢᠨᠳᠤ ᠶᠠᠪᠤᠭᠳᠠᠵᠦ᠂ 5 ᠡᠳᠦᠷᠦᠨ ᠬᠤᠭᠤᠴᠠᠭᠠᠨᠳᠤ ᠰᠠᠭᠰᠤᠨ ᠪᠥᠮᠪᠦᠭᠡ᠂ ᠠᠯᠠᠭᠠᠳᠠᠬᠤ ᠪᠥᠮᠪᠦᠭᠡ᠂ ᠥᠳᠦᠨ ᠪᠥᠮᠪᠦᠭᠡᠶᠢᠨ ᠤᠷᠤᠯᠳᠤᠭᠠᠨ ᠪᠣᠯᠤᠨ ᠰᠤᠨᠢᠷᠬᠠᠯᠳᠤ ᠤᠷᠤᠯᠳᠤᠭᠠᠨ ᠵᠡᠷᠭᠡ ᠤᠯᠠᠨ ᠬᠡᠯᠪᠡᠷᠢᠶᠢᠨ ᠬᠥᠳᠡᠯᠭᠡᠭᠡᠨᠢ ᠥᠷᠨᠢᠭᠦᠯᠪᠡ᠃
ᠥᠪᠦᠷ ᠮᠣᠩᠭᠤᠯᠤᠨ ᠬᠡᠪᠯᠡᠯᠦᠨ ᠪᠦᠯᠦᠭᠯᠡᠯᠦᠨ ᠬᠣᠶᠠᠳᠠᠭᠴᠢ ᠤᠳᠠᠭᠠᠨᠤ ᠠᠵᠢᠯᠳᠠᠨᠤ ᠲᠠᠮᠢᠷᠤᠨ ᠤᠷᠤᠯᠳᠤᠭᠠᠨᠤ ᠡᠬᠢᠯᠡᠯᠳᠡᠶᠢᠨ ᠶᠣᠰᠤᠯᠠᠯ᠂ ᠰᠤᠨᠢᠷᠬᠠᠯᠳᠤ ᠤᠷᠤᠯᠳᠤᠭᠠᠨ᠂ ᠱᠠᠩᠨᠠᠯ ᠣᠯᠭᠤᠬᠤ ᠶᠣᠰᠤᠯᠠᠯ 10 ᠰᠠᠷᠠᠶᠢᠨ 16ᠤ ᠡᠳᠦᠷ ᠬᠦᠬᠡᠬᠤᠳᠠᠶᠢᠨ ᠪᠦᠬᠦ ᠠᠷᠠᠳᠤᠨ ᠪᠡᠶᠡ ᠴᠢᠭᠢᠷᠠᠭᠵᠢᠭᠤᠯᠬᠤ ᠬᠥᠳᠡᠯᠭᠡᠭᠡᠨᠦ ᠲᠥᠪᠲᠦ ᠶᠠᠪᠤᠭᠳᠠᠪᠠ᠃ ᠪᠦᠯᠦᠭᠯᠡᠯᠦᠨ ᠶᠡᠷᠦᠩᠬᠡᠢ ᠵᠠᠬᠢᠷᠭᠠ ᠵᠢᠴᠢ ᠬᠠᠷᠢᠶᠠᠳᠤ ᠨᠢᠭᠡᠴᠢᠶᠢᠨ 13 ᠳᠦᠯᠦᠭᠡᠯᠡᠭᠴᠢᠶᠢᠨ ᠠᠩᠭᠢᠨᠢ ᠳᠡᠷᠢ ᠳᠡᠭᠱᠢ ᠮᠥᠷᠯᠡᠨ ᠵᠢᠭᠳᠡ ᠠᠢᠵᠠᠮ ᠠᠯᠬᠤᠭᠠᠪᠡᠷ ᠤᠷᠢᠶᠠ ᠬᠠᠰᠭᠢᠷᠤᠨ ᠲᠠᠯᠠᠪᠤᠷᠲᠤ ᠣᠷᠤᠯᠠ᠃ ᠪᠦᠯᠦᠭᠯᠡᠯᠦᠨ ᠨᠠᠮᠤᠨ ᠬᠣᠷᠢᠶᠠᠨᠤ ᠱᠦᠵᠢ᠂ ᠬᠡᠷᠡᠭ ᠮᠡᠳᠡᠭᠴᠢᠳᠦᠨ ᠳᠠᠷᠤᠭᠠ ᠱᠤᠸᠠᠩ ᠯᠦᠩ ᠤᠷᠤᠯᠳᠤᠭᠠᠨ ᠡᠬᠢᠯᠡᠭᠰᠡᠨᠢ ᠵᠠᠷᠯᠠᠵᠦ᠂ ᠪᠦᠯᠦᠭᠯᠡᠯᠦᠨ ᠨᠠᠮᠤᠨ ᠡᠭᠦᠷᠦᠨ ᠳᠡᠳ᠋ ᠱᠦᠵᠢ᠂ ᠶᠡᠷᠦᠩᠬᠡᠢ ᠳᠠᠭᠠᠭᠠᠮᠠᠯ ᠽᠸᠩ ᠬᠠᠨᠡᠴᠡ ᠪᠦᠬᠦ ᠠᠵᠢᠯᠳᠠᠳ ᠤᠷᠤᠯᠳᠤᠭᠠᠨᠳᠤ ᠢᠳᠡᠪᠬᠢᠳᠡᠢ ᠣᠷᠤᠯᠴᠠᠵᠤ᠂ ᠤᠷᠤᠯᠳᠤᠭᠠᠨᠤ ᠪᠠᠶᠠᠷ ᠴᠡᠩᠭᠡᠯᠢ ᠬᠠᠮᠳᠤᠪᠡᠷ ᠡᠳ᠋ᠯᠡᠵᠦ᠂ ᠤᠷᠤᠯᠳᠤᠭᠠᠨᠦ ᠵᠣᠷᠢᠭ ᠰᠠᠨᠠᠭᠠᠶᠢ ᠳᠤᠬᠠᠢᠯᠠᠭᠰᠠᠨ ᠠᠵᠢᠯᠳᠤᠪᠠᠨ ᠲᠤᠭᠤᠱᠢᠯᠠᠭᠤᠯᠵᠤ᠂ ᠨᠡᠩ ᠱᠢᠯᠢᠳᠡᠭ ᠠᠵᠢᠯᠤᠨ ᠬᠢᠷᠢ ᠪᠦᠳᠦᠮᠵᠢ ᠤᠯᠬᠤᠶᠢ ᠤᠷᠢᠶᠠᠯᠠᠵᠤ ᠡᠬᠢᠯᠡᠯᠳᠡᠶᠢᠨ ᠶᠠᠷᠢᠶᠠ ᠲᠠᠯᠪᠢᠵᠠᠢ᠃
ᠰᠤᠨᠢᠷᠬᠠᠯᠳᠤ ᠤᠷᠤᠯᠳᠤᠭᠠᠨᠨᠢ 《ᠳᠡᠪᠡᠭ ᠱᠢᠳᠡᠬᠦ》᠂ 《ᠨᠢᠭᠡ ᠪᠦᠰᠡ ᠨᠢᠭᠡ ᠵᠠᠮ》᠂ 《ᠬᠥᠯ ᠪᠥᠮᠪᠦᠭᠡᠪᠡᠷ ᠤᠨᠤᠭᠠ ᠢᠰᠭᠦᠯᠬᠦ》᠂ 《ᠬᠠᠭᠤᠷᠠᠢ ᠵᠠᠮᠤᠨ ᠮᠥᠰᠦᠨ ᠲᠠᠪᠤᠷᠠ ᠭᠤᠯᠭᠤᠭᠤᠯᠬᠤ》᠂ 《ᠨᠣᠮ ᠪᠤᠭᠤᠳᠠᠯᠯᠠᠨ ᠲᠦᠷᠭᠡᠨ ᠳᠠᠮᠵᠢᠭᠤᠯᠬᠤ》᠂ 《ᠶᠠᠰᠤᠳᠤ ᠮᠡᠯᠡᠬᠡᠢ ᠬᠢᠭᠡᠳ ᠲᠠᠤᠯᠠᠢ ᠤᠷᠤᠯᠳᠤᠬᠤ》 ᠵᠡᠷᠭᠡ ᠬᠥᠳᠡᠯᠭᠡᠭᠡᠨᠢᠶᠡᠷ ᠪᠦᠷᠢᠯᠳᠦᠵᠦ᠂ ᠣᠷᠤᠯᠴᠠᠭᠰᠠᠨ ᠬᠥᠮᠦᠨᠦ ᠲᠣᠭᠠ ᠤᠯᠠᠨ᠂ ᠳᠥᠷᠦᠯ ᠵᠦᠢᠯ ᠤᠯᠠᠨᠢᠶᠠᠷᠢᠶᠠᠨ ᠤᠷᠤᠯᠳᠤᠭᠠᠨᠤ ᠲᠠᠯᠠᠪᠤᠷᠢ ᠤᠯᠠᠮ ᠬᠦᠷ ᠬᠥᠭᠵᠢᠶᠡᠨᠢᠶᠠᠷ ᠪᠢᠯᠬᠠᠭᠤᠯᠵᠦ᠂ ᠤᠷᠮᠠ ᠬᠠᠢᠷᠠᠯᠠᠵᠦ ᠤᠤᠬᠠᠢᠯᠠᠭᠰᠠᠨ ᠠᠯᠠᠭᠠ ᠲᠠᠱᠢᠯᠲᠠᠶᠢᠨ ᠳᠠᠭᠤᠨ ᠲᠠᠰᠤᠷᠠᠯᠲᠠᠦᠭᠡᠢ ᠦᠷᠭᠦᠯᠵᠢᠯᠡᠵᠦ ᠪᠠᠢᠪᠠ᠃ 13 ᠲᠥᠯᠦᠭᠡᠯᠡᠭᠴᠢᠶᠢᠨ ᠠᠩᠭᠢᠶᠢᠨ ᠳᠠᠮᠢᠷᠴᠢᠳ ᠤᠷᠠ ᠳᠡᠮ᠂ ᠤᠬᠠᠭᠠᠨ ᠲᠠᠮᠢᠷᠢᠶᠠᠨ ᠰᠣᠷᠢᠯᠴᠠᠵᠤ᠂ ᠬᠡᠪᠯᠡᠯᠦᠨ ᠠᠵᠢᠯᠳᠠᠨᠤ ᠬᠠᠮᠵᠢᠯᠴᠠᠨ ᠨᠢᠭᠳᠠᠷᠠᠬᠤ᠂ ᠬᠠᠮᠲᠤᠪᠡᠷ ᠲᠡᠮᠡᠴᠡᠬᠦ ᠵᠣᠷᠢᠭ ᠰᠠᠨᠠᠭᠠᠶᠢ ᠬᠠᠷᠠᠭᠤᠯᠵᠤ ᠴᠢᠳᠠᠭᠰᠠᠨᠶᠤᠮ᠃
10 ᠰᠠᠷᠠᠶᠢᠨ 16ᠤ ᠦᠳᠡᠶᠢᠨ ᠬᠣᠢᠨᠠᠬᠢ ᠲᠡᠭᠦᠰᠭᠡᠯᠦᠨ ᠶᠣᠰᠤᠯᠠᠯᠳᠤ ᠤᠷᠤᠯᠳᠤᠭᠠᠨᠳᠤ ᠣᠷᠤᠯᠴᠠᠭᠰᠠᠳᠲᠤ ᠬᠤᠪᠢ ᠬᠥᠮᠦᠨᠤ ᠱᠠᠩᠨᠠᠯ᠂ ᠬᠠᠮᠲᠤ ᠨᠡᠢᠳᠡᠶᠢᠨ ᠱᠠᠩᠨᠠᠯ᠂ ᠣᠶᠤᠨᠤ ᠪᠣᠯᠪᠠᠰᠤᠨᠤ ᠱᠠᠩᠨᠠᠯ ᠪᠣᠯᠤᠨ ᠱᠢᠯᠢᠳᠡᠭ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠᠶᠢᠨ ᠱᠠᠩᠨᠠᠯ ᠭᠠᠷᠲᠠᠭᠤᠯᠵᠦ ᠬᠥᠬᠢᠭᠦᠯᠦᠨ ᠵᠣᠷᠢᠭᠵᠢᠭᠤᠯᠪᠠ᠃
ᠲᠤᠰ ᠤᠳᠠᠭᠠᠨᠤ ᠲᠠᠮᠢᠷᠤᠨ ᠤᠷᠤᠯᠳᠤᠭᠠᠨᠨᠢ ᠨᠡᠢᠲᠡ ᠠᠵᠢᠯᠲᠠᠨᠳᠤ ᠮᠠᠱᠢ ᠰᠠᠢᠨ ᠬᠠᠷᠢᠯᠴᠠᠭᠠᠨᠤ ᠪᠣᠯᠤᠮᠵᠢ ᠬᠠᠩᠭ᠋ᠠᠵᠦ᠂ ᠠᠵᠢᠯᠤᠨ ᠶᠠᠭᠠᠷᠠᠤᠴᠠᠭ ᠵᠠᠪᠢᠶᠡᠨ ᠵᠠᠢᠴᠢᠯᠠᠵᠤ ᠠᠵᠢᠯᠲᠠᠨ ᠠᠵᠢᠯᠴᠢᠳᠤᠨ ᠪᠡᠶᠡ ᠰᠡᠳᠭᠢᠯᠦᠨ ᠶᠠᠳᠠᠷᠠᠭᠠᠶᠢ ᠳᠠᠢᠯᠬᠤᠶᠢᠨ ᠬᠠᠮᠲᠤ ᠨᠥᠬᠦᠷᠯᠡᠯᠢ ᠪᠠᠲᠤᠳᠭᠠᠵᠤ᠂ ᠬᠠᠮᠲᠤᠴᠢ ᠦᠵᠡᠯᠦᠨ ᠤᠬᠠᠮᠰᠠᠷᠢᠨᠢ ᠴᠢᠩᠭ᠋ᠠᠳᠭᠠᠵᠦ᠂ ᠠᠵᠤ ᠠᠬᠤᠢᠯᠠᠯᠤᠨ ᠰᠣᠶᠤᠯᠤᠨ ᠠᠭᠤᠷ ᠠᠮᠢᠰᠭᠤᠯᠢ ᠨᠡᠩ ᠥᠳᠭᠡᠷᠡᠭᠦᠯᠪᠡ᠃
